ORANJESTAD (AAN): Dia 10 di april lo inicia e di 10 edicion di Curaçao Internacional Film Festival.
Durante e film festival prestigioso aki e ultimo documentario largo metrahe di Rebecca Roos lo conoce su 'World Premiere' .
Lo tin dos oportunidad di wak e documentario I Can’t Be Moe; Alice van Romondt (I can’t be tired) na Corsow: 12 di April pa 7:30 PM y 14 di April pa 1:30 PM na The Movies Otrobanda.
Un siman despues, 19 di April, lo estrena e documentario na Aruba pa 8:00 PM na Cas di Cultura. Prome cu e estreno na Aruba tin oportunidad unico di wak un exposicion di un seleccion di Alice su coleccion priva di arte den e sala di expo di Cas di Cultura for di 6:30 PM.
Na tur tres estreno “filmmaker y subject” lo ta presente.
Den I Can’t Be Moe ta sigui e persona Alice Van Romondt cu den e mundo di arte na Aruba, pero tambe den henter Caribe Hulandes ta un persona hopi influyente. E mes no ta artista pero e ta inspira y encurasha hopi persona masha diverso pa sigui cu proyectonan di literatura, musica, arte plastico, teatro y kico cu ta, cu ta cay bao di arte of proyectonan social.
Originalmente e idea tawata pa sigui Alice pa 6 luna, den cua tawata tin un agenda hopi yen di evento na Aruba y den exterior. Asina lo a duna un bista completo di e “fenomeno cu ta Alice van Romondt”. Pero net prome cu lo a cuminsa filma, COVID a dal cera mundo.
Asina ta cu al fin al cabo mester a haci algun cambio, y a sigui Alice pa dos aña entre 2020 y 2022.
Aunke cu e proyecto a encontra hopi reto unico, Rebecca Roos a keda contento cu e resultado final den cua no unicamente ta haya un potret di un persona dinamico y cu ta inspira, pero via di dje y su actividadnan tambe di e industria creativo na Aruba y den Caribe Hulandes completo.
