*“Y nos lo sigui haci esaki durante periodo demisionario”
ORANJESTAD (AAN) – Minister Presidente, Evelyn Wever Croes, a referi tambe na e tema di leynan, den conferencia di prensa, den e contexto di Gobierno Demisionario.
Minister Presidente a indica cu pa loke ta leynan tin algun ley den pipeline, di cual algun a bay Parlamento caba y nan ta den tratamento na Parlamento y otronan cu mester bay Parlamento ainda. Y ta dicidi na Parlamento si ta yama nan y si ta trata nan.
“Dos ley cu ta importante, uno ta na Parlamento caba y otro ta na caminda, ta trata nos presupuestonan. Nos presupuesto 2025 ya ta na Parlamento caba y nan ta atendiendo cu esaki. Parlamentarionan tin oportunidad, e luna aki, pa haci pregunta y nos ta contesta nan. Ohala cu e wordo trata prome cu 15 di December, manera cu ley ta stipula”, e mandatario a bisa.
El a indica cu e otro ley ta e Presupuesto Supletorio 2024, cu gobierno a anuncia caba y a tuma decisionnan caba na Ministerraad prome cu gobierno a bira demisionario.
“Esaki ta na caminda pa bay Parlamento y ohala cu e wordo trata manera cu e ta bay normalmente. Den e presupuesto supletorio 2024 hunto cu loke nos ta yama e Najaarsnota, tin algun proyecto adicional, cu nos a premira y cu eigenlijk nos a anuncia caba, pero e fondonan no ta aproba ainda pa Parlamento, pues e ley mester pasa prome y despues e fondonan ey por wordo aloca”, Minister Presidente a señala.
Minister Presidente a expresa cu esaki ta den lineanan general di kico ta pasa ora un gobierno ta demisionario unda ministernan no por tuma decisionnan di cambia maneho, of bin cu cambionan cu no ta presupuesta, pero Departamentonan lo sigui haci nan trabao, manera nada a cambia, con tal cu ta e maneho cu nan ta bin ehecutando.
“Esaki ta pone cu pa e ciudadano mucho no lo cambia. Y mi ta asegura nos comunidad cu bo por sigui confia riba nos. Bo por sigui den e mesun forma responsable, serio y con responsabilidad cu mi a bin ta goberna e pais aki pa siete aña, y nos lo sigui haci esaki tambe den e periodo demisionario aki, poniendo semper e interes di nos ciudadanonan na prome lugar”, Premier Wever-Croes a subraya.
