Edutech y e prepacion di muchanan pa culminacion era digital
- Riba un telefon votador por sigui gobernacion di su pais
- E desaroyo di e mucha Arubano den Era Inteligencia Artificial
ORANJESTAD (AAN)- E palabranan Inteligencia Artificial, ta sona hopi dificil y realmente ta crea hopi dificultad te awe pa personanan cu kier tene nan mes na sistemanan cu nan conoce, pasa e barera necesario cu ta duna prueba cu e avancenan moderno sigur ta na interes di hende, si hende haci uzo debido di nan.
Cu Inteligencia Artificial ta sirbi democracia ta resalta den e forma cu hende por haci uzo di su telefon pa haya informacion cu e mester di tur rond mundo, pa vigila su interes.
Con importante esaki ta pa democracia, sigur ta bini dilanti na paisnan dictatorial caminda e canalnan necesario pa duna informacion na Pueblo ta wordo cera y obstrui.
Felicidad di Pueblo ta basa den e forma cu democracia ta exigi pa tin transparencia di den tur loke ta pasa na nomber di Pueblo den gobernacion y tur informacion cu ta wordo brinda dor di Comercio, Sindicato, organisacionnan di interes, por alcansa Pueblo.
Contacto di hende cu hende a bira internacional den un tempo relampago y na Aruba como pais liber, mester tene consideracion cu e problemanan cu esaki por provoca tambe.
Pa e desaroyo di mucha e Era di Inteligencia Artificial, e Era Digital, ta crea posibilidadnan enorme pero tambe ta un responsabilidad grandi di gobernacion y personal cu ta traha den e sector aki mescos cu mayornan pa por yuda e mucha haci bon uzo di e posibilidadnan nobo, pero tambe por prepara su mes pa traha pa su mes y su comunidad den e cambionan mundial.
DIARIO a dicidi pa atende e topiconan aki na inicio di e temporada escolar 1923 pa 1924 pa diferente motibo.
Na forma acelera hende ta haci uzo di Inteligencia Artificial y esaki ta nifica cu e hoben di awe mester ta prepara debidamente pa e por acepta su responsabilidad como manager, gerente, di futuro riba tur tereno.
Retonan grandi ta dilanti e generacion di muchanan cu den e sistema escolar mester bay prepara pa futuro pero na mes momento haci uzo di posibilidadnan existente.
Democracia ta exigi pa gobernacion di e pais carga e prome responsabilidad pa Pueblo haci uzo di loke ta na interes personal y nacional di un comunidad.
DIARIO den e copilacion di informacionnan cu Pueblo di Aruba a ricibi, ta considera di interes grandi e fecha di 14 di juni 2023 ora e programa di Edu-tech a wordo presenta den JFK Education Center.
Edutech ta e fondo cu ta haci inovacion posibel pa schoolnan, personal den educacion y estudiantenan.
Na un forma moderno, cu ta mas facil pa capta cu sistemanan conoci, Gobierno ta stimula e ampliacion di conocemento di e posibilidadnan cu e Era Digital, Inteligencia Artificial ta nifica.
Gobierno di Aruba mes ta duna un ehempel con por splica hende na forma facil, loke segun democracia hende mester tin como informacion.
Nos ta tuma un ehempel.
Uno di e exigencianan mas grandi di bon gobernacion, ta e forma cu ta atende cu placa di Pueblo.
Manera DIARIO a splica na tanto occasion, ley ta regla con ta gasta placa di Pueblo.
Den pasado e sistemanan skirbi tabata poco dificil pa comprende. Awe na un forma sumamente moderno, sin mucho palabra pero cu ilustracion hasta atractivo, Pueblo por tuma nota con Gobierno ta gasta su placa.
Ciencia moderno a duna prueba di e importancia di ilustracion, imagennan, ora ta comunica cu otro.
Esaki ta nifica cu cantidad cu trabou cu tabata necesario antes, awor ta wordo elimina. E computer ta yuda traha frase, ta entrega informacion y ta percura pa bunita presentacion.
Pues e ser humano mester educa su mes pa domina e Era Digital, cu ta scapa hasta bida humano ya cu awor tin banconan di informacion medico entre otro pero tambe asina necesidad pa crea departamentonan nobo di Polis pa tene e porta di ladronicia creciente den mundo digital, cera.
E-learning ta e programa piloto cu a start na 2019 pa e sector Escolar na Aruba y ta encera proyectonan pa e habri porta pa e retonan nobo cu mundo ta ofrece.
Manera Prome Ministro Wever-Croes a anuncia na introduccion, 400 Mil Florin a wordo pone na disposicion di e realisacion di proyectonan.
Informacion y mas informacion ta necesario den e tempo di Inteligencia Artificial, den cual hende ta entrega su deseonan, su informacionnan na programanan cu ta entrega e contesta necesario sigur den e mundo di enseñansa cu manera Prome Ministro Wever-Croes a trece dilanti na inicio di e proyecto, ta e base di futuro di Pueblo!
