LISBOA: Casi 3.000 Bombero ta tur dia riba pia ta luchando contra un candela cu pa cinco dia caba ta causando teror den parti zuidwest di Portugal,
mientras cu e pais bisiña Spaña ta pasando den un episodio di calor intenso cu tin gran parti di e peninsula aki na alerta.
Como 900 Bombero cu sosten di 10 avion tankero cu awa, ta sigui traha den Odemira, cerca di e region turistico di Algarve, unda ya caba varios mil hectare a kima, segun e prome calculonan.
Den e anochi di Dialuna pa Diamars, nan a logra stabiliza e perimeter di e candela, pero tabatin dos punto critico cu a rekeri demasiado esfuerso. Habitantenan di como binti municipio y turistanan cu tabata cu vacacion kedando den algun hotel chikito y Airbnb a haya nan obliga di evacua Dialuna di eynan. Hopi di nan a wordo aloha na un scol cu a wordo transforma den shelter.
Casi 1.500 persona a wordo evacua desde Diasabra cu a pasa. Como 40 persona, incluyendo 28 Bombero, a ricibi yudanza na Servicio di Emergencia.
Otro candela importante ta kimando mondi den region di Leiria, na e parti central di Portugal. Pero esaki a bira un tiki menos intenso riba Diamars, despues di a destrui como 7.000 hectare caba.
Alrededor di 2.800 Bombero y 16 avion tanker cu awa ta trahando Diamars mainta rond di henter Portugal. Temperatura lo tin di bay baha un tiki dianan aki, aunke algun lugar ainda e lo ta yegando como 40º Celsius. Dialuna cu a pasa na Santarem, den parti central di Portugal, e temperatura a yega 46,4º Celsius, cu a bira un record pa 2023.
E estado di alerta ta sigui na tur dos banda di frontera, cu e parti zuidwest di Spaña riba ‘Alerta Oranje’ desde Diamars, y e provincia di Córdoba na Andalucia riba ‘Alerta Cora’, cu ta indica riesgo extremo.
Awe Diaranson, temperatura na Spaña lo por yega 44º Celsius, pasobra esaki lo bay bira e piek di e ola di calor aki, cu ta e di tercer ola di calor di verano aki.
E calor di 44º Celsius lo por wordo sinti riba Diahuebs tambe, cu varios provincia Spaño cu Alerta Cora, manera Andalucia, region di Madrid, Castilla la Mancha, tambe parti panort na Pais Vasco y rond di dje.
Durante fin di siman, mas di 1.000 hectare a kima na Spaña. Ademas un candela nobo a start Dialuna atardi na Extremadura, cu ta un region bisiña di Portugal, y ainda nan no a logra domin’e.
E peninsula di Iberia ta den e prome linea di global warming na Europa, pasando den hopi dolor di cabez cu secura y incendio.
