Segun Rudy Leysner, presidente di Fundacion Movimento ta Bida:
ORANJESTAD (AAN) – Fundacion Movimento ta Bida, a puntra pa un presupuesto pa un dos of tres persona di servicio, si nan mester, y programanan, etc., cu ta un suma di 450 mil florin. Rudy Leysner, presidente di FMTB a señala, den entrevista cu DIARIO.
El a agrega cu nan a puntra tambe pa e gruponan social pasobra nan ta haya durante 3 aña, for di CEDE Aruba, 4 mil florin. Pero despues di tres aña e fondo di Hulanda tambe ta caba, y no ta haya mas.
“Nos ta boga pa Gobierno pone un pot di 150 mil florin y pa e gruponan social cu ta bezig cu adulto mayor den cada bario, laga nan fia di Cede Aruba, cu tin structura caba, nan sa con pa traha y despues, e poco placa cu nan ta haya pa traha cu adulto mayor, nan ta lague rindi”, Leysner a splica.
FMTB a mira esey cu e ocho gruponan cu nan a forma y nan ta yudando e otro 22 gruponan tambe, y eigenlijk tur e gruponan mester un sosten, financieramente. E ta kere cu gobierno por pasa e suma di 150 mil florin pa aña pa CEDE Aruba, p’asina aki e gruponan social por a haci mas actividad pa e adulto mayor.
El a subraya cu gobierno ta scucha FMTB su voz, y e voz di hopi organizacion cu e adulto mayor mester di apoyo. “Como adulto mayor cu ta trahando pa varios aña caba cu nos grandinan, y mi sa cu tin hopi necesidad, y hopi problema social di e grandinan. Mi ta kere cu mester habri wowo y cuminza traha, yuda e gruponan cu ta yuda e adulto mayor”, Rudy Leysner a reitera.
El a agrega cu prome cu gobierno a cay, e fundacion tabata tin un reunion cu Parlamento y nan a bisa cu nan ta bay pone e fundacion riba presupuesto. Pero tin cu ta bis’e cu nan ta riba presupuesto y tin cu ta bis’e cu nan no ta riba presupuesto, pero kico ta exactamente ningun hende ta bisa. E ta busca tur caminda pa haya sa, pero te ainda e no ta haya e informacion corecto, kico ta kico. “Mi ta kere cu nos mester ta mas abierto, mester traha hunto, mester sinta hunto, cuminza dialoga kico exactamente nos mester y nos grandinan mester, y na unda nos mester bay. Y gobierno tin cu scucha nos. Mester scucha nos voz y e voz di nos grandinan.
“Hopi biaha politiconan tin nan propio agenda y nos ta sinti cu nos agenda no ta wordo scucha, nan mes tin nan propio direccion pa cana cu nan kier sigui bay, pero no ta scucha e grandinan ni e organizacionnan cu ta traha cu hende grandi caba”, Rudy Leysner a subraya.
