Mientras oposicion y coalicion ta morto na soño
ORANJESTAD (AAN): “Si nos a acepta tur tipo di medida pa enrikece caha di gobierno , e ora ta momento, pa despues di 40 aña cu nos ta gaba cu nos turismo y nos economia ta bay asina bon, pa e empleado y e pueblo trahador cuminsa haya e beneficionan di e ganashi”, esaki ta e forma cu Otmar Oduber di Plataforma Pais ta lansa e proposicion pa un ley di Beneficio Economico Laboral (BEL).
Si gobierno di Aruba por introduci tur tipo di medidanan contra pueblo, medidanan cu ta saca placa for di e comerciante directo, hinke den caha do gobierno y ningun hende sa na kico e placa aki ta bay, e ora mester por percura pa e trahador tambe por benifecia di e “boom” economico cu nos Pais ta gozando di dje.
Aña pasa pa menciona un ehempel, a saca 80 miyon Florin adicional for di turismo, a bay den caha di gobierno y ningun hende un sa unda e placa aki a bay, pero awe no tin placa pa drecha RWZI. Mientras esaki ta pasa, ningun di e 21 miembronan di Parlamento ta cuestiona esaki, nan no ta puntra unda e placa aki a bay.
Plataforma Pais ta mira esaki y ta bisa cu a yega momento pa bin cu un Beneficio Economico Labora (BEL), pa medio di cual e pueblo trahador ta bay haya un beneficio directo di e economia creciente y exitoso cu Pais Aruba tin.
E ley ta bisa cu un percentage di e ganashi di e empresa ta bay pa e trahador cu aña aden, aña afor ta yuda e empresa crea e ganashi aki. Por ehempel, si banconan por demostra cu nan a gana 40, 50 miyon den un aña, un percentage di e ganashi aki mester bay pa e trahadornan di e banco.
E percentage aki no lo bira un peso adicional pa e comerciante, pues lo haci cu e percentage aki cu ta wordo duna na e trahador bira deducibel 100% di e winstbelasting di e doño di trabou.
E suma aki no lo conta como un aumento di salario, sino como un beneficio na e trahador, por lo tanto no lo tin gastonan adicional pa e doño di trabou ni pa e trahador. Osea no lo tin gastonan adicional manera entre otro contribucion na AZV, SVB, loonbelasting etc etc.
Meta di e ley ta pa e trahador tin mas placa den su cartera, pa e trahador haya un percentage di e ganashi cu el a yuda contribui na dje. Di e forma aki e trahador lo por tin un miho entrada y indirectamente goza di un aumento den su entrada.
Gobierno di su banda lo genera su fondo door di e mesun ley aki, pasobra e personanan ta bay cumpra bek den comunidad. Esaki ta significa cu mas producto lo drenta Aruba, lo bay tin mas circulacion den nos economia, mas placa lo draai, pero e biaha aki e lo draai bou di e pueblo trahador.
E propuesta aki ta bin banda di loke ya caba e plataforma a bin ta mencionando di reduci gastonan di gobierno.
E plataforma lo ta mandando un carta pa gobierno y parlamento caminda kier habri un discusion riba e posibilidad di e ley di BEL.
