Perspectivanan Invisibel:
Lo explora fotografia haciendo uzo di nan sentido di tacto, sonido y experiencia
ORANJESTAD (AAN): Plataforma Aruba ta anuncia e lansamento di Perspectivanan Invisibel, un programa di fotografia inclusivo dedica na hende cu limitacion visual na Aruba.
E proyecto aki lo duna oportunidad nobo na participantenan visualmente incapacita (esnan ciego of cu bista limita) pa explora fotografia haciendo uzo di nan sentido di tacto, sonido y experiencia, bou guia di artista local y documentarista Rafael Barragán. Barragán lo implementa metodonan pa haci arte visual mas accesibel.
Rafael Barragán a duna di conoce den contacto cu DIARIO cu Perspectivanan Invisibel ta wordo implementa den colaboracion cu FAVI Aruba, cu ta brinda sosten y conocemento esencial pa adapta e programa pa e comunidad cu limitacion visual. E proyecto lo inclui lesnan, practica, y un presentacion di e resultadonan di e participantenan.
E iniciativa ta forma parti di Plataforma Aruba su compromiso pa explora y amplia e concepto di inclusividad den arte visual contemporaneo.
E organizacion kier crea espacio pa comunidad por participa den arte y cultura, y pa puntra nos mes: kico ta nifica ‘accesibel’ den un contexto artistico?”.
Ta invita hende cu limitacion visual cu ta interesa pa participa, y tambe boluntario cu ta desea di yuda den e proceso cu guia y apoyo, pa tuma contacto. Si bo kier uni na e proyecto aki, bo por manda un mensahe via WhatsApp na +297 742 5366 of email عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
Perspectivanan Invisibel ta un proyecto realiza cu e sosten di Let’s Act di CEDE Aruba, cu ta para pa importancia di acceso na arte pa tur hende, Barragán a splica.
Tocante Plataforma Aruba
Plataforma Aruba ta un organisacion non-profit cu ta desaroya proyectonan artistico y educativo pa e comunidad Arubano. Nan kier trece arte visual y e comunidad di Aruba mas cerca di otro. Nan proyectonan ta traha den colaboracion cu artistanan local y profesionalnan den e sector di educacion artistico.
Tocante Rafael Barragán
Rafael Barragán ta un fotografo y documentarista cu ta uza medionan visual pa crea consenshi riba temanan social. Su compromiso cu educacion a guia su implementacion di programanan innovativo cu ta duna hende ciego y cu bista limita acceso na fotografia.
