MEDELLIN: E candidata pa Congreso Colombiano, esta e dama Piedad Córdoba ta confrontando e hecho cu e proceso den Corte Superior ta bay cuminza,
relaciona cu su participacion den politica di e grupo rebelde di FARC. E ex-senadora a laga sa e siman aki, cu dos Embahada cu tin na Colombia ta pretende di extradite, y pesey e ta pidi pa bay biba riba Luna.
“Cu esaki di e tema di extradiccion, mi a dicidi pa bay biba riba Luna, pasobra aya no tin tratado di extradiccion,” Córdoba a bisa riba un mensahe di Twitter.
El a post esaki riba social media, despues cu el a denuncia cu e Embahadornan di Colombia na OEA, y tambe na Merca tin un conspiracion prepara pa extradit’e.
E dama cu ta pertenece na lista di Pacto Historico, a ricibi un mail di un funcionario consular cu yama Mario Hernandez. Den e relato por lesa cu e Embahador di Colombia na Merca, esta Juan Carlos Pinzon tabatin un reunion di 45 minuut cu Michael Kozak, kende ta Sub-Secretario di Estado pa Hemisferio Occidental, unda nan a papia di e caso y di e posibilidad pa e bin responde pa acusacionnan dilanti Husticia Mericano.
E ex-congresista di e partido Liberal a bisa cu e documento cu el a ricibi aki ta parce di ta un extorsion, pasobra e supuesto Mario Hernandez a pidi’e un compensacion husto a cambio di haya e video.
E berdad ta cu na e oficina di Huez di Corte Superior, Cristina Lombana, ta sigui busca testigo pa determina e vinculacion di Piedad Córdoba cu FARC. Ya nan a entrevista Ingrid Betancourt y su mama Yolanda Pulecio, tambe ex-President Andres Pastrana y riba Diaranson a entrevista ex-President Alvaro Uribe Velez.
