ORANJESTAD (AAN): E bon noticia a drenta dialuna mainta caminda cu e compania Pfizer ta confirma cu e vacuna contra Covid-19 ta safe pa muchanan den e edadnan di 5 pa 11 aña.
Pfizer a anuncia cu un ensayo di fase 2/3 a mustra cu nan vacuna di Covid-19 tabata safe y a genera un respuesta di anticurpa 'robusto' den muchanan di 5 pa 11 aña.
Esaki ta e prome resultadonan di e tipo aki publica pa e grupo di edad menciona y e datonan ainda no a wordo revisa ni publica.
Pfizer a bisa cu nan tin planea di presenta pronto e resultadonan na FDA (Administracion di Remedi y Alimentonan di Merca pa e autorisacion di uso di emergencia.
E ensayo a inclui 2.268 participante di entre 5 te cu 11 aña y a utilisa un regimen di dos dosis di e vacuna administra cu 21 dia di diferencia.
Den e ensayonan a usa un dosis di 10 microgram, menor cu e dosis di 30 microgram cu a utilisa pa e hobennan mayor di 12 aña.
E respuestanan inmunitario di e participantenan a wordo midi observando e nivelnan di anticurpa neutralisante den e sanger y comparando e nivelnan cu un grupo di control di personanan di 16 te cu 25 aña cu a ricibi un regimen di dos dosis cu e dosis mas grandi di 30 microgram.
Pfizer a bisa cu e nivelnan ta compara bon cu esunnan di e personanan mayor cu a ricibi e dosis mayor, loke ta demostra un "respuesta inmunitario fuerte den e grupo aki di mucha un luna despues di e di dos dosis".
Tambe, e vacuna a wordo bon tolera, cu efectonan secundario generalmente comparabel na esunnan observa den participantenan di 16 pa 25 aña, e compania a indica.
Pfizer a laga sa cu e datonan aki ta bay wordo inclui den un presentacion a corto plaso pa Merca y cu e empresanan lo continua acumula e datonan necesario pa solicita e aprobacion di FDA pa personanan di 5 te cu 11 aña.
E vacuna di Pfizer/BioNTech actualmente ta aproba pa personanan di 16 aña of mas, y autorisa pa su uso den hobennan di 12 te cu 15 aña.
