ORANJESTAD (AAN) – Representando e Republica Bolivariana di Venezuela, den cuadro di e celebracion di Bicentenario di e Republica di Peru, Luis Zarraga di Fundacion Vene-Aruba Solidario, a hiba palabra durante e ceremonia cu a tuma lugar na Wilhelmina Park.
Luis Zarraga a cuminza su participacion bisando cu pa su persona ta un responsabilidad hopi grandi, ta dilanti e microfon den un dia asina special. El a expresa cu esaki ta un dia hopi special pasobra ta fraterniza cada dia mas e sentimento enorme di cual Minister Glenbert Croes a papia den su discurso.
“Definitivamente e ta contagia nos pasobra nos tin un historia cu ta uni nos for di aña 1800 y awendia nos ta mas ruman cu nunca”, Zarraga a bisa y a haci referencia na e gastronomia di Peru, su historia y su cultura di cual e kier combersa mas di dje cu señor Guillermo Salinas di e Fundacion Fiestas Patrias Peruanas en Aruba.
“Rumannan keri, pabien den e dia memorable aki. Nos ta un comunidad uni na Aruba. Aruba a siña nos con pa ta uni”, el a conclui.
