ORANJESTAD (AAN): Informacion for di Ridderkerk na Hulanda, ta indica cu un pelicula cortico basa riba bida real,
den cual Adino Koeiman ta comparti su testimonio tocante e grandesa di Dios y e poder di Dios Su speranza.
Como hoben Adino a lucha cu adiccion, droga, hortamento, inmoralidad sexual, parandiamento y problema cu ley. Pa hopi aña el a biba den scuridad hunto cu su ruman homber. El a yega na un punto crucial den su bida caminda e no tabata mira e salida mas. Den e momento aki Adino a encontra cu e Dios bibo cual a trece un cambio inmediato den su bida.
House of Worship Hulanda ta presenta e testimonio aki den forma di un pelicula emocionante titula “Pas”. E pelicula cortico aki ta produci pa Pastor Chesron Richardson y dirigi door di Jermaël Lanoy hunto cu co-directora Sharinette Martinez. E produccion aki no tabata posibel sin contribucion di tremendo actornan, e team di media, y diferente otro persona.
E pelicula “Pas” lo tin su estreno Diasabra, 25 di November pa 7:00 pm, na iglesia House of Worship Hulanda situa na Pretoriusstraat 56, 2987AK Ridderkerk.
E anochi spectacular aki siguramente lo bay ta uno bendiciona. E expectativa ta cu e pelicula aki lo impacta y inspira hopi bida. E meta principal di e pelicula ta pa primeramente halsa y glorifica e nomber di nos Salbador Cristo Hesus y cu hopi alma lo ricibi speranza nobo.
