Relaciona cu corupcion y soborno di 735 mil Florin
ORANJESTAD (AAN): Siman a habri y manera a ser spera, ex-Minister di AVP, Paul Croes a presenta solitario na Prison di KIA na Aruba, sin ningun hende hunto cune, pa e bay sinta su castigo di 3 aña di prison. Despues di a purba tur caminda pa yega Roma, na final ta 5 huez di Casacion na Hulanda a indica cu e condena di 3 Huez di Corte Superior, y tambe di Corte di Prome Instancia na Aruba ta e veredicto corecto, y e condena di prison ta valido! No tin nigun otro recurso mas.
E ora a keda Paul Croes nada otro sino baha cabez, y acepta cu un total di nuebe Hues a conden’e pa ta corupto, pues a haci maluso di su poder pa corumpi comerciantenan a cambio di ricibi fabor.
Recientemente e Secretario General di Partido MEP, a refresca memoria di hopi hende, pa mira cu tur e pruebanan acumula pa Ministerio Publico a papia un palabra cla! Como Ministro el a ricibi masha hopi placa a cambio di duna permiso. Tur e pruebanan, incluyendo grabacionnan y declaracion di testigonan, a proba cu e ta hopi corupto y a comete hopi fraude.
Djis mira un ehempel di un passage di e veredicto: Den rekisitor: Pagina 133: Propietario di un Supermarket (Asiatico) a declara cu Paul Croes di AVP a manda pidi 50 paki di tuna, 50 paki di crabmeat, 50 paki di cabaron, 50 bleki di oester, 50 bleki di salmou, 10 boter di mayonnaise, 50 boter di “bread spread”, y 10 boter di oleifi. Declaracion di e comerciante Asiatico. “Ik heb Paul Croes deze goederen cadeau gegeven om het behandelen en versnellen van mijn aanvragen”.
Veredicto Pagina 69 ta comproba un suma di 735.199,94 Florin. Aki e sentencia di hues ta ilustra y prueba un suma di 735.199 Florin cu a pasa atravez di Paul Croes su cuentanan bancario. Placa cu el a ricibi a cambio di fabor y duna permiso. Esaki huesnan a yega na dje pa medio di e investigacion riguroso financiero cu a tuma luga riba cuentanan di e ex Minister di AVP.
Un sentencia den Reino Hulandes cu a manda un mensahe bon cla pa tur politico! Percura pa bo no firma pa loco, ni bira exigente pa enriquece bo mes! Pasobra despues ta abo mes tin di bay sinta riba bo blaarnan den Prison, y ainda sin pidi pordon na pueblo, ta djis bay Prison y bisa cu bo ta asumi responsabilidad.
