CALI: Un pastoor falso bisti den un soutane blanco, a wordo graba riba video “ta duna bendicion” na negoshinan den centro di Cali,
y parce ta trata di un forma di fraude, pues e homber tabata pidi esnan presente pa nan “colaboracion” economico.
Cu awa bendita y oracionnan, e homber tabata cana door di cayanan ta duna bendicion y pidiendo un donacion pa e parokia di e bario Obrero. Sinembargo durante su caminata, el a drenta negoshi di cual e doño ta un laico di e Misa. Pues el a topa cu un berdadero colaborador di e Iglesia, kende no a reconoce, y tampoco sa di e actuacion aki.
Pastoor Jose Ricardo Guzman di e parokia a bisa cu e pastoor falso a drenta negoshi di un di e sirbidornan di Misa, y el a wordo confronta. E pastoor falso a keda sorprendi, y ora el a ripara cu nan a descubri su forma di fraude, el a trata evadi nan y no duna contesta, y na final a rek careda y a huy sali bay di e negoshi.
Denuncia a wordo haci na autoridad, y a cuminza investiga. For di entrevista preliminar, a bin haya sa cu e pastoor falso aki ta haciendo e tipo di estafa aki pa como un luna caba. Esey ta desde cu un Pastoor nobo a bin pa e bario Obrero.
Pastoor Guzman den un entrevista a bisa: “E homber aki a bin gaña e creencia di tur hende cu fe usando e truconan, y ta cana rond den tur negoshi pa duna bendicion a cambio di placa, siendo cu den realidad na ningun bendicion tin un costo, y esey nunca lo no socede tampoco.”
Arquidiocesis di Cali a confirma cu e homber ey no ta pertenece na iglesia, y a invita tur hende pa denunci’e oficialmente asina cu nan mire.
