Pleita casonan den Corte ta bira masha complica:
ORANJESTAD (AAN)—Abogado mr. Zara a sigui splica, den conferencia di prensa tocante e ley LTU aplicable pa personanan indocumenta, cu locual ta pasa na Aruba ta cu mescos cu na Corsou, ora un hende indocumenta ta wordo gara riba caya, e ta haya un orden pa wordo expulsa.
El a señala cu si e persona ta den tramite pa e wordo expulsa y e no kier colabora e por wordo cera un rato. Pero e fout grandi cu ta wordo haci na Aruba ta cu nan ta kere cu bewaringstelling ta mescos cu cera un hende na KIA of na Warda di Polis. Pero e no ta asina, e ta haya un ordo pa cer'e pendiente di su expulsion.
Si e persona aki di un of otro manera no por wordo expulsa pasobra e no kier coopera debi cu e ta pega cu su asuntonan, y gobierno no tin pa paga su pasashi, locual ta pasando masha hopi mes, y e ora ey loke mester haci ta saca e persona aki por lo pronto, lague den libertad y busca un hende pa wak pe te ora cu e wordo expulsa.
Zara a subraya cu aki na Aruba cosnan ta wordo practica na un otro manera. “Nos ta yega, coi hende cera, manera a pasa cu e mucha homber aki, nan a gare tine cera pa casi seis luna, mientras cu fundamentalmente e tin derecho riba un permiso”, e abogado a relata.
Ora mr. Zara a trata e caso aki pa prome biaha, el a scucha for di Hueznan, ya cu el a trece e aspectonan aki dilanti, cu na Aruba por tene un persona asina cera te cu seis luna, y ora cu seis luna yega kizas por cuminza pensa riba derecho humano. A wordo bisa na abogado Zara cu supuestamente, esaki ta basa riba un sentencia di Hof di Corsou.
“Mi no a haya e sentencia aki den mi man; mi ta buscando e y mi ta loco pa haye”, mr. Zara a remarca.
El a subraya cu esaki no ta ley di Aruba pero mester ta di hendenan di Corsou, cu supuestamente e hoben a keda cera pa asina hopi tempo, pasobra ayanan si e por.
Un otro aspecto mas cu ta fastioso, segun mr. Zara, cu tin na Aruba y no tin na Corsou, ta cu cierto momento, den nos leynan, tin un huez den un caso di abogado Zara mes, cu a dicidi di troce e cuestion di Bewaringstelling y a bisa cu mirando cu un huez comisario ta dicidi den dos ora si un persona ta legal of no, esey ta haci cu e Huez cu ta dicidi riba e expulsion, no tin nodi dicidi directamente over di e ceramento, y tur esaki ta haci e casonan aki masha complica, pa pleita na Corte, pa via cu huez a dicidi a base di hurisprudencia di pone ley un banda. “Hasta den e casonan penal tin articulonan cu semper a rigi den procesonan penal, cu ta bisa cu na cualkier momento di e proceso por pidi libertad di un persona. Pero den LTU di Aruba esey no por!” e abogado a remarca.
