*Gobierno mester percura pa no corta fisioterapia for di pakete di cuido
ORANJESTAD (AAN): Marlon Maduro, presidente di Arubaanse Vereniging van Fysiotherapeuten (AVF) hunto cu su coleganan, Marlon Thodé y Conny van Niel, a yama un conferencia di prensa pa expresa nan preocupacion relaciona cu loke Minister di Salubridad Publico, Dangui Oduber a indica recientemente, na unda lo corta presupuesto pa servicio di fisioterapia.
Segun Maduro, nan a nota den medio di comunicacion un decision di Minister Oduber a tuma cu nan no ta di acuerdo cune. El a splica cu AVF a busca varios biaha prome cu Gobierno a sinta, pa reuni y asina nan por a trece nan puntonan dilanti. Maduro a bisa cu nan no a haya ningun contesta, tampoco durante e reunionnan di Formador di Gobierno cu e stakeholders. AVF ta considera nan mes un stakeholder basta importante pa nan rol den cuido, pero nan no a haya oido di Gobierno. AVF tambe a manda carta cu preguntanan pa Gobierno, pero no a haya ni un contesta.
Maduro a menciona cu Minister Oduber a indica cu un di e opcionnan nan a manda pa CAft, ta pa saca fisioterapia for di pakket of por pashentnan mes mester paga pa e tratamento.
Fisioterapia ta mas cu apenas masashi, hopi den pueblo ta kere cu e profesionalnan aki ta un masahista, pero esey no ta e realidad. Masashi ta un parti chikito di nan tratamento. Specialmente den ultimo tempo di e pandemia. Movecion ta e parti mas importante, esaki ta mantene un sistema inmulogico mas saludable y ta yuda den prevencion di cierto problemanan.
E idea semper tabata pa fisioterapistanan forma parti di e comunidad pa stimula mas movecion, como tambe den parti di preveni malesanan. Prevencion ta hopi importante y fisioterapia ta un parti grandi pa un pashent no yega na un malesa cronico of mester un cuido mas extensivo, cu lo costa tanto AZV, SVb y sistema medico, hopi mas placa.
Fisioterapia ta yuda hende haya nan salud bek, door di logra move mihor y asina nan por bay asumi nan trabao trankil y nan bida diario.
AVF mes a haci un investigacion chikito di cifranan di AZV y nan ta sigur cu tin hopi mas otro parti cu nan por corta y mantene nan den sistema di cuido. Maduro a enfatiza cu si wak cifranan, tur otro parti di cuido a conoce un aumento y di nan a baha. Den ultimo 5 aña e presupuesto pa fisioterapia practicamente no a conoce cambio. Nan tarifa ta fiho y nan tin un limite di tratamento pa aña. Cada fisioterapista por duna 3210 tratamento pa aña. Pa 2020 e presupuesto pa fisioterapia a baha pasobra algun di nan coleganan a baha cu pension. Pa motibo di problemanan financiero di AZV, no a yena e puestonan habri, mientras cu nan a acorda cu asina un fisioterapista baha cu pension, ta duna otro cu ta riba lista un chens pa cuminsa su practica y asina yuda den disminui e lista di espera.
Maduro ta puntra Gobierno con nan ta bay scapa placa riba un profesion cu no ta conoce un aumento di gastonan y ta costa placa, compara cu otro servicionan di cuido medico.
E ta enfatiza cu si Gobierno saca fisioterapia for di pakete, apesar di tur e placa cu cada persona ta paga na premie halto di AZV, y hasta doñonan di lugarnan, cu mester paga double, como doño y trahador di e compania, y pashentnan mester bay paga pa nan mesun tratamento of busca un seguro apart, esaki ta bay causa un problema grandi pasobra hende no tin placa. Hopi hende a perde trabao of ta cobrando menos placa, clase medio a bira mas chikito y mayoria no tin placa pa gasta.
Maduro a recorda cu 50 plussers ta e grupo mas grandi den poblacion, y esaki ta bay bira e grupo di riesgo, y seguro no ta sigura nan y si nan haci esaki mes, e premie ta bay ta hopi halto. E consecuencianan ta bay ta grandi pa Gobierno y companianan mes. Mas trahador lo bay cu a.o. y mas hende lo keda cas pasobra nan ta malo y ta purba di recupera riba nan mes.
Den su opinion Gobierno mester traha cu nan den parti di prevencion y asina yuda comunidad bira mas saludable, cu lo scapa caha di Gobierno hopi placa.
