Shailiny Tromp-Lee di MEP:
ORANJESTAD (AAN): Parlamentarionan di Aruba ta na Hulanda pa atende reunion di IPKO. Fuera di temanan manera geschillenregeling y structura di reunion, e delegacionnan di e islanan lo atende tambe e tema di esclavitud y slavernijverleden y e retonan di e union monetario entre Curacao y St Maarten.
Segun Shailiny Tromp-Lee di MEP, pa loke ta trata esclavitud e discusion lo enfoca riba e dispensacion y declaracionnan cu a tuma lugar formalmente di parti di Hulanda, y con e tres islanan den un front unifica por exigi un miho contesta, cumplimento y reparacion structural den e fondonan priminti. Sigur tin cu sigui trata e parti di “invulling achter de komma” cu Hulanda a priminti.
Durante e proximo reunion Tripartiet nos lo trata tambe e union monetario entre Corsou y Sint Maarten. E union aki, caminda e dos paisnan rumannan ta comparti un solo moneda y un solo Banco Central (CBCS) desde aña 2010, ta confrontando retonan cual nos lo scucha mas di nan durante e reunion.
Mientras cu un union monetario den teoria ta ofrece bentaha, manera un moneda stabil y supervision financiero comparti, e realidad den practica ta trece tensionnan politico pa locual ta trata e gobernacion di e banco central. Ademas, e echo cu e paisnan aki no por hiba un maneho monetario independiente ta un factor di peso. Pa e motibo aki, e discusion riba un posibel dolarisacion tambe a bolbe drenta e debate publico.
Como parlamentario, mi ta interesa pa haya un bista cla riba e retonan aki durante e Tripartiet. Desde 1986 Aruba a scohe conscientemente pa su propio caminda cu un moneda nacional y un maneho monetario autonomo a traves di Central Bank of Aruba. Den e cuadro aki, nos experiencia exitoso por brindanan un perspectiva cla y lesnan valioso riba e bentahanan y retonan di por hiba un maneho monetario completamente independiente, yudando nan den e decisionnan importante cu nan tin nan dilanti.
Den Tripartiet tambe lo debati ariba uzo di Papiamento y lenga materno di cada delegacion den reunionnan Tripartiet.
Un propuesta presenta den e reunion preparativo pa Tripartiet pa e delegacion di Aruba: e uzo oficial di e lenga materno durante e reunionnan entre e islanan di Caribe Hulandes. E proposicion a keda haci pa parlamentario Hendrik Tevreden pa cada pais por expresa su mes den e idioma cu e ta papia na cas. Actualmente, e discusionnan ta varia entre Ingles, Papiamento y Hulandes.
Si e proposicion ako keda aproba, segun parlamentario Shailiny Tromp Lee, e lo yuda pa e representantenan expresa nan ideanan cu mas claridad, creando un ambiente structural di confianza pa traha miho riba e futuro areglo y negociacionnan cu Hulanda.
Pa finalisa Tromp-Lee a indica cu mañan reunion Tripartiet ta inicia y despues ta sigui cu IPKO. Tromp-Lee ta indica cu e reunionnan ta largo y hopi intensivo, cuminsando desde mainta trempan. E fraccion di MEP den preparacion ta consisti di Parlamentario Hendrik Tevreden, Endy Croes, Edgar Vrolijk, Rocco Tjon y Shailiny Tromp-Lee.
