Tocante pashentnan saca for di Verblijfafdeling Respaldo:
ORANJESTAD (AAN) – Parlamentario Misha Raymond, di fraccion di RAIZ, ta recorda comunidad cu diamars 1 di November awo, e departamento di Verblijf di Respaldo a cera. Como parlamentario, el a manda un carta pa Minister Rocco Tjon, desde dia 19 di Augustus, pero te awo no a ricibi ningun contesta.
Raymond a splica cu e carta no solamente ta riba e tema di Verblijfafdeling pero tambe riba e funcionamento general di Respaldo. E no a haya contesta riba e carta aki ainda, y siman pasa el a bolbe manda un carta mirando cu 1 di November ya tabata den porta y kico esaki ta nifica pa e famianan cu ya caba mester a tuma den cuido nan ser keri cu tabata den verblijfafdeling. Tambe den e carta aki tin peticion pa e minister contesta e carta di dia 19 di Augustus ultimo, pa haya un tiki claridad kico ta bay pasa.
Un di e preguntanan cu parlamentario Raymond a haci ta kico ta e solucion sostenible y duradero cu e famianan aki por conta cune, pa no ta asina sensitivo na e maneho di un organizacion, pa loke ta bay pasa cu nan sernan keri, na momento cu Respaldo ta indica cu tin falta di fondonan pa funciona manera semper, si ya caba esey a conduci na ciere di un departamento.
E dama parlamentario a menciona cu el a haci pregunta tocante e situacion financiero di Respaldo, y con esaki ta sinta. E sa cu e famianan no ta wardando riba un contesta di e organizacion, pero si riba kico ta bay pasa cu nan sernan keri, ki opvang nan por conta riba dje, pa na e momento cu nan bin cerca nan.
Parlamentario Raymond ta kere cu esaki ta un problema severo cu mester wordo atendi cu prioridad, y cu no por keda warda riba dje. El a reitera cu e ta wardando riba contesta di e minister, y e ta kere cu un tool cu parlamentarionan tambe tin, ta pa yama un reunion di vragenuur cu Conseho di Minister, ora cu nan no ta hayando contesta na nan preguntanan.
El a subraya cu e ta spera di haya den corto un solucion pa e situacion aki pasobra ora tin un persona cu tin un problema psiquico no ta solamente e ta cargu'e, pero henter e famia tambe.
Y peor ainda, si ta un problema cu nan no a spera ni a prepara riba dje y na su bista no tin ningun sosten rond di e famia pa sostene esaki.
Parlamentario Misha Raymond a splica cu e tabata tin diferente schedule pa loke ta diferente reunion di comision, pa e por haya diferente contestacion, incluyendo un reunion cu minister Tjon, pero no a logra. Pesey el a bisa cu e por uza e tool di vrangenuur, pa yama cierto ministernan aden, pa haci cierto preguntanan, cu no a wordo contesta. Esaki ta parti di e frustracion cu tin, segun e parlamentario. El a bisa cu el a pidi pa e minister bin sinta den e comision y den e caso aki por pidi tambe un reunion publico, pa responsabiliza kico ta pasando cu e pashentnan aki.
