*Den dialogo mester yega na e balans!
ORANJESTAD (AAN)—Parlamentario Raymond Kamperveen, di fraccion di RAIZ, den entrevista cu DIARIO a comenta, tocante e vision di Minister Ursell Arends encuanto e tema di vergunning pa e taxistanan, y tambe e posicion di e taxistanan mes.
El a bisa cu enberdad tin hopi bendemento di vergunning, cu ta patrimonio di pueblo, y a bisa cu e tin entendi cu Minister Arends a entrega un denuncia na Ministerio Publico.
E ta haya cu e asunto aki ta serio. Pero di otro banda mester tin comprension pa e taxistanan, pasobra nan no ta crea un di dos pensioen ora nan wordo hubila. “Dus, aworaki nos tin cu busca e balance, pasobra di un banda mester compronde e taxistanan pero di otro banda mester compronde nos, di pueblo; pasobra mi ta yama mi mes pueblo tambe, pasobra mi ta representa e pueblo. Nos tin cu baha cu 65 aña, ki dia bo ta entrega bo vergunning? 65? 70? Pasobra mas grandi nos bira mas peliger nos ta riba caminda”, Kamperveen ta bisa.
E miho manera pa yega na un solucion ta cu dialogo, sinta na mesa y yega na otro. Asina e Parlamentario a indica.
El a agrega cu, como Parlamentario, tin cu respeta e derecho di cada ken, cada ken ta welga pa su derecho, y bo ta lague, pero mester tene cuenta cu nan a perhudica un tiki e turismo, pero nan a pone nan punto cu claridad, y e ta duidelijk. “Mi ta spera cu pa dia 16 cu nan ta sinta cu Minister, mi persona como presidente di Comision di Transporte, a manda pidi griffier caba un reunion mas lihe posible, si por dia 19 of dia 20 mes, di biaha pa nos sa: 1. Con ta bayendo cu e taxistanan, si nan a keda contento di loke minister Arends a trece dilanti, y di 2. Nos ta yama tambe e minister den e comision pa bin aden, pa splica nos kico ta pasando, kico ta e cambionan, y sigur e pregunta di con el a tuma e decision di e MB, pa nos tambe por sa”, e Parlamentario a bisa. E kier si pa e mandatario sinta den Parlamento pa informa Parlamento cu mas claridad over di con e MB aki a bin na vigor asina ey. “Un di nan cu mi por saca afo ta esun di cinco pa siete stul, pasobra tin turista cu ta bin cu mas famia y nan tin cu split, y tin 4 mil camber cu ta bay habri un bez aki, nos ta bay tin ‘over-population’ di turista y bo ta sintie caba”, e parlamentario a bisa.
El a mira na Baby Beach, den fin di siman, con tin tur e tentnan poni, anto bao di e matanan di druif, pa nan sinta disfruta di e lugar, y e ta haya cu e ta birando di mes. “Cuanto mas nos kier? Turismo ta nos economia? Si! E ta nos pilar, nos mester biba cu ne, pero nos mester biba cu otro, y e no mester bira di mas. Pasobra di mas nos pueblo ta bay cuminza reacciona riba esey, y nos no kier esey tampoco”, Parlamentario Kamperveen a enfatiza.
