Pa busca solucion pa e werksternan, entre otro: *Asina formacion di gobierno keda cla
ORANJESTAD (AAN) – Parlamentario Endy Croes, a reacciona den conferencia di prensa di fraccion di Partido Movimento Electoral di Pueblo (MEP), tocante e peticion cu e lider di MAS, Parlamentario Marisol Lopez-Tromp y su colega señora Gunn, pa un reunion publico, pa yama Minister Presidente aden, tocante un tema di werksternan cu ta toca Minister Lampe ainda, comokiera cu gobierno nobo no a wordo forma.
Croes a bisa cu por a mira cu Parlamentario di Accion 21, Miguel Mansur tambe a firma e carta pa e tin un minimo di tres firma.
“Locual nos ta lamenta ta, cu e experiencia cu Marisol tin, envez di uza esaki pa e guia tanto su fraccion como su combo, den e caso aki Accion 21, e mester por sa cu na e momentonan aki nan no por manda yama Minister Presidente, pasobra den nos Constitucion ta para hopi cla cu e minister cu ta keda demisionario ta esun encarga, y den e caso aki si e kier tin mas informacion pa cuestiona, lo tabata corecto pa yama e minister concerni cu ta Minister Lampe”, Endy Croes a señala.
El a subraya cu Fraccion di MEP tin comprension pa e situacion di e werksternan. “Mi mes den reunion publico akinan den Parlamento, recien siman pasa, a vocifera na momento cu nos a trata presupuesto, a aloca fondonan extra pa nan. Nos tin comprension pa e posicion di SKOA; pero, loke nos ta pidi si, ta pa no perhudica e alumnonan. Laga nos cuminza scol debidamente, pa brinda e muchanan e educacion cu tanto nan merece. Nos ta pidi duna espacio, na Formador Evelyn Wever-Croes, pa e termina e parti cu ya ta den un fase hopi avanza, pa forma e gobierno. Mi sa cu esey ta e deseo di Aruba, di comunidad, di tur departamento y sector priva”, Endy Croes a acentua.
Endy Croes ta pidi tambe SKOA pa laga e minister nobo, un bez cu tur cos ta cla dentro di poco, pa sinta cune na mesa y busca solucionnan, tanto pa e problematico di werksternan y otro demandanan y posicionnan cu tin mester di solucion den e caso aki. “Nos ta pidi e comprension ey”! Parlamentario Endy Croes a remarca.
