ORANEJSTAD (AAN): Segun Parlamentario Darlaine Guedez-Erasmus di MEP, e asina yama “Plan di mayor, Responsabilidad pa cu yiu comparti!” ta uno cu tey pa proteha muchanan.
Na Aruba hopi mucha ta pasa dificil, pa motibo cu mayornan tin cu busca 2 trabao pa mantene nan famia. Den mayoria caso esaki ta bin door cu e otro mayor no ta yuda cu alimentacion di e yiu.
Como 70% di e casonan na Directie Voogdijraad tin di haber cu alimentacion! Sinembargo e muchanan ya caba tin cu enfrenta e realidad di separacion di mayornan y ta hopi importante pa no causa mas stress na e mucha. Esaki ta un di e motibonan cu comision voortgezet ouderschap, a bini cu un propuesta di ley Ontwerp – Landsverordening Voortgezet Ouderschap.
Plan di mayor: Dialuna ultimo, comision fiho di Asuntonan Social y Famia di Parlamento a reuni cu e comision. Nos a haya un presentacion amplio di e propuesta di ley cu a keda entrega 2 siman pasa na Parlamento. E concepto di ley ta encera un plan di mayor. Un plan obligatorio cu mester worde traha prome cu e mayornan ta bay separa. Pa asina yuda nan regla y cumpli cu tur nan responsabilidadnan comparti pa cu cuido di nan yiunan. Por ehempel, cuminda, paña, educacion, cariño y atencion pa cu e muchanan.
Nos como pais tin obligacion pa sigui traha leynan pa asina proteha nos muchanan y yuda nan crece sanamente. Implementando e plan di mayor aki, nos ta pone nos muchanan bienestar na prome lugar.
“Ami ta haya importante pa e ley aki worde trata pronto den Parlamento,” Guedez-Erasmus a indica.
