ORANJESTAD (AAN): E aña aki ta conmemora e di 32 aniversario cu e paisnan rond di mundo a firma e tratado cu meta pa protege tur mucha bou di 18 aña na mundo.
Na aña 2001 Aruba tambe a firma e Tratado aki, haciendo asina e compromiso pa proteha di un forma mas completo posibel e desaroyo di e mucha den su personalidad, talento, capacidad emocional, mental y fisico.
Aruba tin un comision di Derecho di mucha cu tin e tarea, conseha gobierno riba implementacion di e Tratado, ehecucion di e responsabilidad internacional pa raporta encuenta e Tratado y concientisa e comunidad tocante e derechonan di mucha.
Como Parlamentario, mi por menciona cu tin hopi organizacion cu ta trahando duro pa desaroyo positivo pa e derechonan di mucha aki na Aruba. Den Parlamento tambe ultimamente a cambia e leynan pa asina proteha nos muchanan. E compromiso semper mester t'ey pa sigui traha riba e punto aki pa mira bienestar di tur mucha.
Ta importante pa nos como adulto, tuma e dia aki pa refleha riba con nos ta tratando e muchanan y kico nos por haci, pa asina proteha y yuda e muchanan crece bon.
Pa e dia aki, lo tin diferente actividad. Gobierno di Aruba bou di encargo di Ministerio di Husticia y Asuntonan Social hunto cu opvoed commissie a organiza un funwalk na Playa.
Organizacion tambe tin nan mesun actividadnan rond di nos isla. Ban participa hunto cu e muchanan den e actividadnan aki y ban semper brinda nos muchanan hopi amor. Feliz dia internacional di derechonan na mucha na tur e muchanan di nos pais!
