Pasaheronan desapunta cu Aerolinea a mustra nada di preocupacion
- Avion di Divi Divi Air tabatin 10 pasahero abordo
- Por lo menos un pasahero a keda cu miedo di bula
ORANJESTAD (AAN): Un momento di panico a dal 10 pasahero cu tabata bulando Dialuna siman pasa abordo di e avion DHC-6 Twin Otter riba e ruta di Aruba pa Curaçao, y tabata den final-approach pa Aeropuerto di Curaçao.
Ta trata di vuelo R-283 di Divi Divi Air cu a sali di Aeropuerto di Aruba banda di 7:25 pm riba e vuelo di 34 minuut aki.
E periodista local Lelicia Tromp a trece e primicia aki, y a entrevista un di e pasaheronan femenino kende a divulga cu e situacion di mas increible a socede ora cu ya caba nan ta den ultimo minuutnan prome cu ateriza. E avion tabatin solamente 1 piloto abordo, y en total tabatin como 10 pasahero.
E pasahero aki tabata sinta mas patras, cerca di e porta di avion. Entre e asiento aki y e porta tin un pida bashi pa asina pasaheronan por cana pa drenta of sali.
Porta a dal habri: E avion di Divi Divi Air a bula na un altura di solamente 7.000 pia. Pero toch vuelonan di distancia cortico ta wordo pressuriza ya for di 5.000 pia bay ariba. Esaki ta pone cu ta sumamente dificil pa porta dal habri ora di vuelo. Sinembargo ora cu avion drenta e sector di aterizahe, y a cuminza cu su descenso, e presion extra paden ta wordo elimina y e presion paden y pafo ta bira balansa. E momento ey si porta por dal habri.
Esaki ta loke a socede tambe durante e vuelo. E porta patras di e avion diripiente a habri y a keda como 3/4 parti habri. Asina cu aire turbulento a cuminza drenta y esaki a pone cu diripiente e porta a habri completamente.
E porta no a habri cu e fenomeno di ‘rapid decompression’, pasobra e balansa tabata igual paden cu pafo. Pero como cu e avion ta bulando e momento ey cu velocidad di como 130 nudo (cu ta 240 km/h), e biento a cuminza produci sonido mahos den e porta. Cabey di tur hende a cuminza zwaai sin fin.
Esaki ta e tipo di porta cu ta habri bay abao, cu e trapi traha den dje, y wanta cu dos kabel diki.
Pasaheronan a trata na cera e porta: E pasahero femenino a indica cu el a lanta un tiki pa trata na wak si e por yega na e dos kabelnan aki pa rek e porta bek pa cera. Por a mira cara di tur pasahero den panico, y den shock pa mira e porta. E pasahero masculino sinta banda di dje tambe a trata na haci esey, pero tabata dificil.
Pa suerte tabatin un hoben sinta mas dilanti, cu uniforma di Marina Hulandes cu a los su seatbelt y a cana bin patras y na un forma balente a brinda su ayudo y trata di cera e porta bek. Asina a cer’e un poco y a keda cune wanta na e kabelnan te ora cu e avion a ateriza na Aeropuerto di Curaçao. Pasobra no tabatin ningun forma pa sa con pa cera e porta bek hermeticamente.
Loke e pasaheronan no a gusta, ta con Divi Divi Air despues di esaki a trata na haci comosifuera e cos cu a socede “ta nada”, of ta algo super normal.
E pasahero femenino a indica cu nan a keda babuca ora cu e piloto a bin puntra nan kico a socede, pasobra el a “mira den spiel” cu algo a pasa patras. Acaso no tin ningun indicador di luz den cockpit cu un of mas porta di e avion a dal habri?
Pasaheronan den shock a sali di avion, drenta Terminal y despues bay cas. Sin cu ningun hende di e aerolinea a puntra nan si nan ta OK, si acaso nan kier awa of awa salo contra e spanto, ni nada.
Nan ta desapunta: E periodista Lelicia Tromp a indica den su programa, cu el a hasta trata di haya contacto cu e Aerolinea aki riba loke a socede, pero nan tabata djis bira lomba pa no duna ningun comentario.
Kico haci awor? E pasahero femenino a indica cu despues di e sucedido aki, el a keda cu miedo extremo di viaha atrobe den avion por lo pronto. E ta lamenta cu Divi Divi Air no a ni duna un muestra di preocupacion cu loke a pasa abordo, y ni con e pasaheronan a sinti.
Nan no sa mes si acaso Aviacion Civil di Curaçao a investiga e incidente aki pa haya sa con el a socede. Y esaki ta algo cu nan ta lamentando awor.
Pasobra si e porta aki door di e presion inmenso a wordo ranca y kibra di eynan, e porta lo por a bay dal den e horizontal stabilizer di e rabo, of kizas hasta e vertical rudder, cu lo a nifica perdida di control inmediato di e avion. Pa suerte e porta a keda na su sharniernan pa asina e pasaheronan por a bin duna relato di loke a socede Dialuna siman pasa.
