Comerciantenan Uni a discuti cu companianan di utilidad
ORANJESTAD (AAN): E organizacion di Comerciantenan Uni Aruba (CUA) tambe tabata presente den reunion cu Gobierno y companianan di Utilities Aruba NV a ofrece na gremionan pa splica e situacion cu a conduci cu nan mester a adapta tarifanan di awa y coriente entrante Augustus.
Francis Saladin di Comerciantenan Uni, a indica despues di e reunion cu e invitacion mes nan a haya di Ministro Glenbert Croes. A haya un splicacion riba e filosofia cu WEB Aruba NV tin pa sigui un maneho pa semper purba na reduci e tarifa cu ta cobra pa produci awa y coriente, y con keto bay e compania ta depende di combustible HFO (Heavy Fuel Oil) den su planta na Balashi.
Como cu for di algun luna pasa caba e prijs di HFO a subi barbaramente, na Aruba e compania di WEB Aruba NV a dicidi na “absorba” e subida aki usando nan reserva di placa cu e compania ta pone un banda.
Pero dado momento despues di algun luna, e wega di Sinterklaas aki no por a sigui, y a haya obliga na hisa tarifa di Awa y Coriente entrante 1 Augustus 2022.
Esaki a socede, sinembargo pueblo ta siguiendo noticia internacional y a ripara cu prijs di crudo a cay bek bastante, y hasta prijs di gasolin y diesel na Aruba a conoce reduccion substancial e luna aki.
Esaki ta algo cu e gremionan a discuti tambe cu e companianan di Utilidad durante e reunion recien. Segun Francis Saladin a bisa cu nan a mustra nan cu e ta refleha ‘un poco straño’. Pasobra awor cu prijsnan mundial ta bahando, ata Aruba ta hisa tarifa di awa y coriente, y te aki 6 luna lo bolbe ‘revisa’ e tarifa.
Comerciantenan Uni y e demas gremionan a papia riba esey tambe na mesa, pasobra e ta algo cu henter pueblo por nota. Toch nan a keda insisti cu te aki 6 luna lo bolbe reuni y evalua e tarifa.
Pues pueblo lo keda horca cu e tarifa aki di awor te Januari 2023. Aki ta unda cu gremionan a pidi e companianan di utilidad, cu nan lo kier un reunion atrobe prome cu e 6 luna ey yega. Nan no a ricibi un confirmacion completo di esey lo socede.
Francis Saladin a bisa cu nan a pidi e reunion ey prome cu e deadline di 6 luna, pa wak toch si acaso prome cu e seis luna yega, toch algo por wordo haci.
Toch e ta compronde cu e compania WEB Aruba NV a “come” den un reserva, cu awor tin di bay yena bek, y esaki ta a base di exigencianan financiero cu e compania tin di cumpli cune.
Comerciantenan a bisa cu nan lo a prefera cu WEB Aruba NV a hisa tarifa di comienzo di aña, di forma cu e aumento lo a keda mihor balanza pa resto di aña, envez di a hisa un tarifa asina drastico cu e ta causa hopi mas efecto.
Prijs di productonan: Awor e prijs di comestible lo baha awor cu Gasolin y Diesel a baha? Tin di corda cu pa proximo 6 luna, tarifa di Awa y Coriente lo bay ta halto. Agencianan importador di cuminda, tin Freezernan grandi cu ta cendi 24 ora pa dia, 7 dia pa siman.
Pa colmo, awor Ministro di Economia a haci e Canasta Basico mas grandi, y esey ta limita e margen di ganashi cu cada comerciante mag di haci riba cierto producto. Siendo cu e Canasta Basico no ta tene cuenta at all cu e gastonan extra di coriente pa e negoshinan.
Cierto cuminda den freezer diripiente a bay den Canasta Basico. Pero e comerciante no por paga su Freezer hopi biaha pa dia, simplemente no por. Pues gasto di coriente ta sigui core halto, pero e ganashi pa cierto cuminda ta limita debi cu Canasta Basico ta stipula e prijs maximo. Esey ta algo cu comerciantenan tampoco no ta di acuerdo cune, esta cu no ta tene cuenta cu prijs di energia.
