ORANJESTAD (AAN) – Docter Yuri Casseres, tambe a forma parti di e team di salud cu a duna update tocante e situacion di Covid-19 na nos pais, y el a elabora tocante e parti di Hospital dr. Horacio Oduber.
El a reitera locual Minister Presidente a bisa, cu e situacion ta bao di control, pero cu ainda ta critico. El a splica cu e ola aki di Covid meymey di nos ta halto, tambe e cantidad di hende ingresa na Hospital ta halto, y mescos e cantidad di hende den (Intensive Care Unit) ICU.
Hospital a yega na e momento cu cuido intensivo ta yen y tur dia mester manda hende na Colombia y nan ta gradici cu Colombia ta acepta di tuma pashentnan cu covid-19, di Aruba.
Aworaki tin 21 pashent cu a wordo manda na Colombia cu eigenlijk mester conta hunto cu esnan cu ta den ICU na Hospital dr. Horacio Oduber.
Dr. Casseres a señala cu hunto cu personal di ImSan, personal cu a bin di Hulanda, y esun di Hospital mes cu a yuda a logra un maneho pa crea 20 cama mas pa cuido intensivo, pa asina por yuda tur e pashentnan akinan mes, mientras cu ta crea espacio pa otro pashentnan por drenta.
Dialuna di 20 pashent interna tabata tin dos pendiente pa bay Colombia, y asina e situacion ta, dr. Casseres a subraya. El a agrega cu berdad e pashentnan cu ta drenta den e afdeling normal di Covid ta bahando, y hospital ta contento cu e cantidad di opname ta bahando, bo obstante, un parti di e pashentnan ainda tin cu bay na ICU. El a remarca cu aworaki, ainda hospital ta trahando duro, y nan no ta sintando relax pasobra e casonan ta bahando; nan ta tumando tur e medidanan ainda, entre otro nan ta cerando sala di operacion y cierto operacionnan no por bay door, pa asina por yuda tur pashent cu covid-19.
“Nos no a cera full e ‘elective zorg’ kiermen tin pashent cu ainda por wordo opera; y claro, nos ta haci un diferencia entre esnan cu mester di ayudo mas lihe cu otro, pero toch nos ta purba pa pashentnan cu tog mester di cuido riba sala di operacion, pa nos por yuda nan. Pero enberdad nos no por draai full capacidad. Nos ta spera cu si enberdad e casonan ta sigui baha den hospital, e ora ey si nos por draai mas den sala di operacion y otro plan di zorg. Pero, manera nos ta mira, e siman aki e lo no ta bay ta e caso. Pesey nos kier yama for di hospital na tur pashent, danki pa nan comprension pasobra mi por imagina mi cu si bo tabata apunta pa un operacion, pa nos ta fastioso pero pa e pashent ta hopi fastioso. Mi ta spera cu nos haal in tur eseynan pronto”, Dr. Casseres a subraya.
Finalmente, docter Casseres a haci un suplica, ya cu Crisis Team a suaviza algun medida, pero ainda nan no ta asina leu di bisa “dal bay”. “Corda cu nos cuido intensivo ta yen, no cu covid-19 so, pero cu otro pashentnan tambe. Nos no por haya hopi accidente tampoco, pasobra esey ta bira un druk extra pa nos ICU. Dus, nos ta spera cooperacion di tur hende tambe; asina, bay cauteloso, cuida curpa pa no duna nos e extra druk riba cuido intensivo.
Mi kier gradici tur hende cu ta trahando riba e diferente afdelingnan. Nos ta purba yuda tur hende, nos sa cu e cantidad ta halto pero nos ta purba verwacht cu e cantidad ta bahando y cu pronto nos ta bay sali di esey”, Docter Casseres a subraya.
