Segun CEO di AHATA, Tisa LaSorte:
ORANJESTAD (AAN) – Duna apoyo y sosten na e diferente scolnan cu ta den e ramo di Horeca, ta un prioridad pa Aruba Hotels and Tourism Association (AHATA). Asina e CEO di AHATA, Tisa LaSorte, a reitera den un entrevista reciente, cu DIARIO. Esaki ta un punto cu den diferente ocasion el a trece dilanti.
LaSorte a señala cu eynan ta na unda nan falta trahado, manera Koki, entre hopi otro. Pesey e aña aki tambe AHATA ta hopi bezig ta yuda cu curriculum, ekipo, strategia, etc. Y nan ta colaborando cu hopi scol y cu otro instancianan cu ta representa dunador di trabao.
“Esey mas tanto nos ta colabora pa bin cu sugerencianan, wak kico ta e sugerencianan, asina nos ta colabora mas cu nan. Pues, nos ta pone prioridad pa colecta e tipo di budget aki pa nos por tin e placa pa nos duna apoyo cu placa tambe, pero nos tin nos miembronan cu ta yudando tambe cu conocemento”, Tisa LaSorte a señala.
E dama a reitera cu AHATA ta purbando di yuda na diferente manera specialmente den e parti di HORECA. “Cu nos ta colabora cu otronan si, pero mas tanto pa nan bin cu idea, sugerencia, recomendacionnan, y solucionnan hunto”, LaSorte a subraya.
El a agrega cu e problema ta asina grandi cu no por tin un solucion, pero solucion mester bin di diferente direccion.
“Parti di dje ta cu e dunador di trabao mester ta conciente di e cambionan cu tin den e mercado laboral, kico nan por haci pa ta un dunador di trabao mas atractivo”, el a splica.
“Esey kiermen cu, no solamente e deseonan of expectativa di e trahado ta cambia di un dunador di trabao, pero tambe e generacion. E generacionnan mas hoben tambe tin diferente manera con nan ta mira trabao, of con nan ta mira un doño di trabao”. El a bisa.
“Esey ta e manera cu dunador di trabao mester adapta cuanto cu e por”, Tisa LaSorte a acentua.
El a reitera cu e motibo pa cual AHATA a papia cu gobierno ta pasobra nan a papia di algun asunto cu tin di haber cu Ley Laboral; of si ta trata di mehora e sistema entre DPL cu DIMAS y cu otro instancianan cu tambe ta depende di dje, por ta husticia mester colabora.
“Pues si bo ta papiando di cierto beleid cu mester cambia y cu e ora ey bo mester hinc’e den practica, bo mester colaboracion por ta, di Minister di Finanzas, of Minister di Husticia. Pues, tur mester colabora cu otro y p’esey semper nos mester di gobierno pa yuda nos cu solucion”, LaSorte a señala.
AHATA ta kere cu no ta un solucion so, pero mester di varios solucion, incluyendo e Ley Laboral, cu tin hopi aña ta papiando cu mester moderniza esaki. “Por ta, no por haci tur pareu pero mester prioriza algun di nan cu por yuda nos ta mas productivo den nos economia y nos mester mehora e sistemanan y mester yuda nos educacion tambe no solamente na scol, pero tambe pa yuda hende compronde e tipo di trabaonan cu tin na Aruba”, Tisa LaSorte, CEO di AHATA a señala.
