Frank Benita di DOW:
ORANJESTAD (AAN): Diaranson atardi durante un conferencia di prensa teni den stacionamento di Censo na Playa, un di e Hefenan na DOW, esta Frank Benita,
a splica cu ora cu a haya sa cu e fecha di eleccion a cambia, y cu e biaha aki e cantidad di stemlokaal a subi y yega te na 70, mesora nan a core busca extra stemhok pa yega Aruba na tempo.
“Esaki ta 8 urna mas compara cu eleccion anterior, y esey a trece tambe cu DOW mester a bay busca mas stemhok, y eseynan lo yega prome cu e fin di luna aki,” Benita a splica.
E stemhok cu Aruba a manda busca ta igual cu esnan ya existente. Y pa nan yega trempan, nan lo wordo treci pa e isla via transporte aereo.
Benita a splica cu DOW a traha 8 team special cu a ricibi instruccion, y cu lo ta trahando extensivamente e lunanan aki.
Cada team lider lo bay haya como 10 urna electoral bao di nan encargo, y nan lo bay bishita e urnanan di cual mayoria ta scolnan publico. Ta haci cita cu e cabezantenan di scol, pa asina dicidi cual di e lokaalnan lo bay bira ‘urna’.
DOW mes ta keda encarga un biaha mas pa setup e stemlokaal, e stemhok, y e buzonnan. Lo bay pone hopi borchi cu ta hopi comprendible pa tur votador sa con nan tin di cana y unda tin di para.
Lo cuminza dianan 17 y 18 di Juni caba ta transporta tur material pa cada stemlokaal, y dianan 23 y 24 di Juni lo bay haci e setup pa asina Diabierna dia 25 di Juni tin eleccion. E siguiente dia ya DOW lo tey bek pa recoge tur material.
E marcamento di linea y ponemento di baricada lo bay ta hunto cu e team special di DVG pa yuda tur hende mantene distanciamento social riba dia di votamento. E Task Force lo bay ta pasando pa check si cada setup ta cumpli cu protocolnan.
