Minister Ursell Arends:
* Problematica di cacho lo wordo atendi
*Mentalidad di comunidad mester cambia
ORANJESTAD (AAN): DIARIO a combersa cu Minister Ursell Arends riba algun situacion cu comunidad por a biba den fin y comienso di aña relaciona cu cachonan perdi.
E problematica aki a presenta di un manera serio. Tabata un temporada record di cachonan cu a perde spanta pa motibo di tiramento di klapchi.
DIARIO a cuminsa na puntra Minister Arends su opinion mirando cu actualmente gobierno tin un campaña cu ta na bienestar di e bestianan, y ta esun di chip pa cacho y pushi. Esaki sigur ta un bon iniciativa pa asina tur mascota por ta registra riba un registro nacional di bestia.
E mandatario a cuminsa bisando cu e situacion cu bestia ta algo cu ta sumamente preocupante. Hopi biaha ta kere cu e animalnan tin culpa, pero mayoria di biaha tin di haber cu doñonan iresponsabel. Ta e ser humano esun cu tin culpa y pesey caba pa e ultimo aña a bin ta propaganda pa transforma y cambia e cultura cu tin na Aruba pa asina e doñonan por bira doñonan di mascota responsabel.
E campaña di chip ya caba tin dos aña cu ta andando pa loke ta introduci e 'microchipping' pa ora cu e animalnan perde, nan por wordo localisa y entrega na nan doño bek.
A bisa cu den 2024 ta bay tin cambionan y ya caba el a anuncia cu tabata bezig implementando ta un maneho cu a wordo hereda. Ta e 'National Plan for Stray Animals' y pa januari-februari ta bay implementa un maneho nobo mirando cu e maneho cu a hiba, den su parecer, ta atende cu e sintomanan, pero no ta atende cu e raiz di e problema mes.
Minister Arends a agrega cu esey ta loke ta bay cambia. Ta bay bin cu un maneho cu ta atende cu e raiz di e problema pa asina e plan cu ta wordo implementa por yuda comunidad cambia di perspectiva pa asina'ki por tin doñonan responsabel.
El a sigui bisa cu den regio mes tin paisnan cu tabata tin e mesun problema cu Aruba, manera Medellin na Colombia y a transforma y a cambia e mentalidad hunto cu e ciudadanonan pa asina e hendenan por a bira doñonan di mascota responsabel.
Na Aruba, ta bay haci mesun cos y pa fin di aña lo bay tin un 'Animal Control Department' di cual e construccion lo cuminsa dentro di poco y esey tambe ta bay yuda atende cu e problematica di cacho y pushi ariba caya, Minister Ursell Arends a declara.
PROBLEMA CU CACHO PERDI
Finalmente e mandatario a indica cu sigur por traha tambe den 'samenwerking' cu otro minister manera Minister di Husticia y otro ministerionan pa loke ta ley. El a bisa cu ley ta ley y niun hende ta riba ley y mester respeta esaki. Esaki el a bis'e den e direccion di loke tabata tiramento di klapchi ya cu pa ley no mag tira klapchi despues di 1 di Januari.
E casonan di cachonan perdi a perdura te Dia di Tres Rey ya cu custumber sin respet ley tambe ta haci e problema di cachonan perdi ainda mas grave.
E departamentonan cu ta atende cu esaki ta birando mas stricto, a bisa, pa asina e fase transitorio cu tabata tin, por percura awor pa tur hende por atene na ley.
"Esaki ta un problema, un cultura cu pa añanan a wordo tolera, pero nos sa cu aworaki si nos ta cambia e mentalidad di comunidad y yega na unda nos kier yega ta cuminsa pa zorg pa hendenan mes atende nan mes cu ley", a remarca.
"Nos tur mester bira mas consciente tambe kico ta e consecuencianan di nos actonan y eynan ta cuminsa cu para keto y analisa cu cambio di mentalidad ta beneficioso pa nos propio Aruba pasobra ora e cachonan y e pushinan ta ariba caya, no solamente anos como ciudadanonan ta wak'e, pero e bishitantenan di nos isla tambe ta wak esakinan y esaki no ta e perspectiva y e imagen cu nos kier pa nos bishitantenan hiba for di nos isla", asina Minister Arends a finalisa bisando.
