Sue-Ann Ras ta splica di con esaki ta necesario:
ORANJESTAD (AAN) – Den entrevista cu DIARIO, Sue-Ann Ras, Coordinador di Kinderopvang y Codigo di Proteccion, a duna di conoce cu el a sinta caba cu Instancianan manera Departamento di Mucha y Hoben, Bureau Slachtofferhulp, y KPA pa bin cu un plan di accion, no solamente pa loke ta trata carnaval, pero tambe otro actividadnan cu sa tin durante e aña.
El a menciona campamento como ehemplo, na unda tambe ta haya hopi situacion di abuso y negligencia di mucha; mayornan ta sinta bebe, muchanan ta pa nan cuenta cu tur consecuencia cu por tin.
“Eigenlijk nos ta sinta aworaki na mesa, pa nos por acumula dato, a base di wak kico tur ta sosodiendo, e preocupacionnan cu ta bin dilanti, kico polis a encontra cu ne, kico ImSan ta encontra cu ne, kico Hospital ta haya na final di e paradanan, pa nos haci un inventarizacion y nos por traha un plan di accion, con nos por anda cu esaki y wak si por tin un ley caba cu nos por hink’e bao di dje, of si ta bira un ley cu nos mester bin cu un proposicion nobo”, Ras a señala.
El a agrega cu ta tristo si pa bisa cu tin mayornan mester haya boet of mester bin cu un menaza pa nan ta mas conciente di e bienestar di nan yiu. “Pasobra con cu bay bin ta keda nan yiunan. Nos por yuda instancianan, departamentonan cu tur sorto di cos pero si abo como mayor no ta asumi bo responsabilidad, anto kico ta bon y kico no ta bon pa bo yiu, bo ta haya toch cu nos ta bay keda cu e situacion aki”, Sue-Ann Ras a declara.
Ras a comenta cu ora el a bay fakkel e no por a imagina su mes cu despues di cas di Gobernador, bo ta haya mucha. “Mucha mi ta papiando di edad entre dos te hasta seis aña, drumi riba trottoir. Gewoon mal benta riba un stul na soño. Y wak e ora? 11-12 or di anochi, den e desorden, den e biento di anochi. Esey no ta lugarnan pa mucha. Tin lugarnan pa mucha y tin momento pa bay cu mucha”, Sue-Ann Ras a remarca.
Mescos cu eleccion di Reina Infantil y Hubenil cu enberdad ta un evento pa mucha, pero no pa mucha di dos aña. Nan no ta disfrutando. Por ta nan ta disfruta un rato pero no cinco, seis ora, den e desorden cu tin eynan.
Pa 2025 lo por wak un cambio, den sentido di maneho, e dama a subraya. “Ta bay bin un maneho riba eventonan publico, na unda eigenlijk, muchanan no mester ta presente. Nos ta bezig ta inventarizando pa wak kico ta e miho maneho cu nos por haci’e un maneho integral na proteccion y bienestar di nos muchanan pero un poco mas preventivo”, Sue-Ann Ras, Coordinador Nacional di Implementacion di Kinderopvang y Codigo di Proteccion na Ministerio di Asunto Social a conclui.
