Meverly Romano, PR di DIMP:
ORANJESTAD (AAN) — Den entrevista cu e Relacionista Publico di Departamento di Impuesto (DIMP), el a menciona cu tin personanan cu tin mas cu un aña sin paga nan number di auto, y DIMP ta yuda nan cu un areglo te cu 2021 pero pa 2022, no tin areglo te aworaki.
Y si e personanan aki tin debenan bieu habri, nan no por paga 2022 ainda si nan no tin un areglo pa e aña bieu. Pues, nan mester cumpli prome cu DIMP laga nan paga 2022.
“Nos ta haci asina, pa evita cu e persona ta cay atras constantemente cu su debenan, y esakinan ta keda bira mas hopi. Kiermen, na dado momento tur e personanan cu aworaki nos tin marca cu nan a paga mitad aña so, of no a paga nada mes, ya caba tin e 50% di boet. Un persona cu no a paga nada y su belasting ta 300 florin pa aña ya caba tin 150 florin di multa riba e 300 florin ey”, Romano a menciona.
El a agrega cu esaki ta haci cu su debe ta keda aumenta, y si e no reacciona pa cera areglo pa cuminza paga, alomenos tiki tiki, e ta bay keda cay atras y ta bira mas dificil pe.
“Berdad tur cos a bira caro. Tin hende tin hopi gasto, pero bo tin cu realiza tambe cu na momento cu bo tin un auto, eta rekeri tambe di cierto responsabilidadnan, y un di nan ta e pago di impuesto. Pa ley e ta asina, y nos tur cu tin un auto y nos kier subi caminda publico cune, tin cu zorg pa nos papelnan ta na ordo, entre otro e impuesto” e dama a reitera.
Meverly Romano a señala cu esaki ta algo pa locual mester para keto un rato, pone disciplina cu parti e suma cu e persona tin cu paga den tanto luna, DIMP ta ofrece aworaki e sistema di pago parcial, kiermen cu ya caba for di September tur hende por a cuminza paga nan number.
“Y awo na Januari, ora cu tur hende a caba di paga nan mitad di aña, ya caba na mitad di Februari por cuminza paga poco, poco, anto fin di Juni ora cu e siguiente ‘date line’ ta yega, e ora ya caba e belasting ta full paga”, Romano a subraya.
El a agrega cu e ta bira algo cu tur hende mester ta conciente, y e ta un obligacion. Vocero di DIMP a sigui splica cu si no paga e belasting, automaticamente e sistema ta genera un cobranza adicional, y esey a genera hopi critica, pasobra e no ta djis cobra e pagonan atrasa sino cu e ta bin cu un boet di 50%.
“Pero e boet mescos cu tur e leynan di belasting ta un sancion pa e persona por cumpli na tempo. E no ta algo necesario, no ta algo cu mester a pasa. Si e persona cumpli na tempo e no sa mes cu tin boet”, el a indica. Romano a bisa tambe cu Ley ta duna DIMP e posibilidad di pone hasta 100% na boet pero nan ta mantene e maximo te aworaki, na 50%. “Pero si por sosode den futuro cu nos ta bay aument'e na, por ehemplo, 60%. Pero esey no ta bay pasa aworaki. Nos ta keda mantene na 50. Pero loke nos ta prefera ta pa e automobilistanan ta conciente di nan responsabilidad di impuesto y tambe cu si e fecha final pasa, e boet ta bay bin riba su nomber”, señora Meverly Romano, PR di DIMP a conclui.
