ORANJESTAD (AAN): Dialuna dia 1 di November lo cuminza na Ateliers ’89 dos workshop nobo.
Uno ta workshop di skirbimento duna pa e conocida autora Alma Mathijsen, y e otro ta un workshop di fotografia duna pa Jessy Koeiman.
Skirbimento: Pa e workshop di skirbimento, awendia por nota cu tur hende tin un storia pa conta, pero con bo por hinke den otro pa asina hendenan por bay sinta na rand di nan stul pa sea scucha of lesa esaki?
Alma Mathijsen ta siñabo con bo por crea y construi un storia. Hunto cu Alma lo bo descubri ki storia mihor bo keda warda un banda, y ki storia si ta vale la pena pa bo conta.
Skirbiendo lo bo traha riba e tecnica. Durante e lesnan lo haci algun ehercicio pa asina bo siña con ta skirbi aun mas liber. E lo no ta un les di gramatica, pues bo por haci cuanto eror cu bo kier. E ta pa bo siña con ta relata un storia bon.
Alma Mathijsen a nace na Amsterdam, y a studia na Gerrit Rietveld Academie Beeld en Taal en Fine Arts, y a sigui e educacion di Creative Writing na Pratt Institute na New York.
Fotografia: Den e workshop di fotografia cu Jessy Koeiman, lo bay enfoca riba e rol di fotografia den mundo di Social Media. Bao su supervision, lo bay analiza por ehemplo cual account riba Instagram ta haciendo e trabao aki bon y haya sa e pakico. Lo bay crea imagennan cu varios tema unda lo purba di captura e herencia cultural na e forma perfecto, y bay experimenta cu diferente forma di procesa potret y demas tecnica.
Jessy Koeiman a studia na Willem de Kooning Academie Rotterdam na seccion Lifestyle & Design. El a enfoca su mes riba fotografia y styling. Na 2017 e tabata co-fundador di e iniciativa di arte ‘We are a movement not a collective’.
E workshopnan aki lo ta di Dialuna pa Diahuebs di 6:30 pm te cu 9:30 pm, y ta pa 12 aña bay ariba. Nan lo ta un luna largo y na final lo duna un presentacion di e obranan traha. Bo por participa na sea un of e otro, pero no tur dos workshop. Lugar ta limita y bo por pasa na Ateliers ’89 na Playa.
