Trias politica y nos democracia na peliger
ORANJESTAD (AAN): Dia 6 di november 2023 hues a bisa den e caso di Otmar Oduber cu tin 31 testigo pa wordo scucha. 30 di e 31 ta riba peticion di Otmar y su abogado y un cu hues mes a dicidi pa añadi, cual ta Marisol Tromp.
“Nos ta para akinan pasobra Ministerio Publico ta permiti pa nos trias politica wordo corompi. a laga politica drenta via porta principal y awe nos trias politica y nos democracia na peliger”, Otmar Oduber a expresa dilanti corte di husticia.
E ta bisa esaki pasobra ora no por a haya nada contra dje, nan a bay colga na un denuncia falso di Marisol Tromp. Ta trata di un persona cu a wordo saca for di tres partido politico, MEP, AVP y POR. “Ami por bisa cu el a wordo saca for di POR pasobra e ta un gañado y tur e puntonan aki ta bay bin dilanti”. E mesun persona aki a haci un denuncia falso contra Chris Dammers kende tabata Presidente di Parlamento di Aruba. Marisol a bay Ministerio Publico entrega un keho falso, a investiga y a castig'e pa a gaña Ministerio Publico.
Despues di esaki Marisol Tromp a bay entrega keho contra Griffier di Parlamento kende a wordo persegui pa añanan y despues e persona aki a sali completamente liber. “Marisol a bolbe gaña cabando cu e persona aki su carera, su nomber, su persona”.
Siguientemente Marisol Tromp a bay Landsrecherche entrega un denuncia contra Otmar Oduber na juli 2020 ora el a wordo baha como minister di POR e tempo ey door cu no tabatin mas confiansa den su persona pasobra e ta un gañado.
Aki ta un por mira con politica a drenta via e porta principal di Ministerio Publico. Un caso cu a cuminsa supuestamente pa bendemento di tereno, corupcion, labamento di placa, grupo di Venezolano, amigo, etc y pa cual nan no a haya nada, e ora Ministerio Publico a bay colga na Marisol Tromp.
Marisol a entrega 27 denuncia contra Oduber, despues di a investiga pa 2 aña largo, ora el a wordo cera, el a wordo cuestiona riba 2 persona cu segun nan, nan ta spookambtenaar. Ta trata di 2 persona cu segun Marisol tabata wordo paga sin traha. Es decir 2 di 27, indicando cu 25 ta mentira.
A entrega keho contra Marisol y awo Ministerio Publico no kier persiguie. “Ministerio Publico of bo ta corompi of bo ta tapando pa Marisol, of porta e ta un informante. Shonnan, ta yega un momento cu ta basta, hende mester habri wowo pa mira kico ta pasando na e pais aki ”, Otmar ta bisa.
Mientras tanto, e mesun Marisol Tromp tabata 2 aña bou investigacion debi cu un director di DIP a entrega keho contra dje. Pero ningun hende tabata sa di dje y Oduber ta puntra e pakico y e dicon. Tur otro caso, comunicado di prensa tabata wordo manda di biaha. Ta hustamente aki unda e trias politica ta cay den otro, Ministerio Publico ta presta su mes pa e corupcion y e abuso di laga politica penetra eyden. “E cos aki ta putri, e ta hole stinki. Ora trias politica ta wordo kibra, bo democracia ta na peliger. E abusonan aki mester caba. Tur loke Otmar Oduber ta pidi ta husticia”.
