Dia Mundial di Hepatitis:
*Malesa ta afectando mas cu 10 miyon hende
ORANJESTAD (AAN)/WASHINGTON DC: Den cuadro di Dia Mundial di Hepatitis (28 di Juli), Organisacion Panamericano di Salud (PAHO/OPS) ta insisti pa paisnan pa amplia e acceso na test y tratamento pa hepatitis viral, cu ta afecta mas cu dies miyon hende den e America, di cual solamente 23% ta diagnostica.
Di e cinco tiponan di hepatitis, B y C ta e tipo cu ta causa mas malesa y morto. Den America, rond di 60,000 pa 100,000 hende ta muri tur aña di e malesa aki. Mayoria di e sintomanan ta aparece den un stadio mas laat di e malesa, ora cu malesa severo di higra of cancer ya a desaroya.
"Hepatitis B y C ta un infeccion cronico silencioso cu por progresa pa cirrhoses of cancer di higra. E noticia bon ta cu tin remedi cu por cura hepatitis C, asina wel como tratamento efectivo pa controla hepatitis B," Dr. Jarbas Barbosa, Director di PAHO a bisa. "Ta crucial pa fortalece nos esfuerso y inversion pa pone fin na e problema di salud publico," el a agrega.
Segun e Raport Global di Hepatitis di Organisacion Mundial di Salud pa 2024, solamente 36% di hende infecta cu hepatitis C mundialmente ta diagnostica y 20% ta haya tratamento curativo. Pa hepatitis B cronico, solamente 13% di e infectadonan ta diagnostica y 2.6% ta haya medicamento pa salba nan bida.
E vacuna contra hepatitis B, cu ta inclui den e skema di inmunisacion di tur pais y teritorio den e region, ta yuda elimina transmision di mama na yiu durante parto como un problema di salud publico. Esaki ta resalta e importancia di sigui vacuna pa preveni infeccion den generacion nobo.
Bao e slogan "Ta tempo pa accion!" pa e Dia Mundial aki, PAHO/OPS ta enfatisa e urgencia di acelera medida pa mehora prevencion, diagnostico y tratamento di e malesa. PAHO/OPS ta traha den colaboracion cu paisnan den e region riba e diseño y implementacion di politicanan nacional pa eliminacion di hepatitis, cu strategia enfoca riba cuido primario. Tambe e ta facilita acceso na test di diagnostico, tratamento y vacunanan na prijs mas accesibel via su Fondo Rotativo Regional.
Dia Mundial di Hepatitis ta wordo celebra riba 28 di Juli y ta un oportunidad pa intensifica e lucha global contra e malesa aki, promove accion y participacion di individuonan, partnernan y comunidad, y enfatisa e necesidad pa un respuesta global mas fuerte. Asina Organisacion Panamericano di Salud (PAHO/OPS) a duna di conoce den un comunicado di prensa.
E dia aki ta pa recorda e aña di nacimento di Dr. Baruch Blumberg, cu a ricibi e Premio Nobel den 1976 pa su descubrimento di e virus di hepatitis B den 1967 y su contribucion na inventa un test di diagnostico y e vacuna corespondiente.
Hepatitis B y C, hunto cu transmision di hepatitis B di mama pa yiu, ta inclui den e Iniciativa di Eliminacion di PAHO, cu tin como meta pa elimina mas cu 30 malesa transmisibel y condicion relaciona den America pa 2030.
