Paul Croes mester bay prizon y Polis na porta di Chris Romero
*Awe contractonan di servicio ta rementa den man di Husticia
*Gobernantenan ta resulta experto den organisacion di crimen
ORANJESTAD (AAN) — Ta Carnaval! Mientras Pueblo pa prome bez despues di pandemia, ta restora e temporada festivo di Carnaval, otro tipo di Baile di Mascarada ta presenta su mes na e votador.
En espera di desenlace, tin e caso Avestrus, cu ta hancra den e investigacion con tereno di Pueblo lo a bira obheto comercial durante campaña politico pa e eleccion di 2013, cu a bira e ultimo eleccion den historia di Aruba autonomo pues prome cu porta a habri a supervision di Reino riba maneho di placa di Aruba.
For di sala di espera a sali e resultado di caso Ibis y condena oficial awor pa Paul Croes, cu mescos cu Benny Sevinger di Caso Avestrus, tabata miembro di Gobierno Mike Eman.
Awe, despues cu hasta Casacion a confirma e delito di cual Paul Croes a wordo acusa, por bisa cu Paul Croes a abusa di su poder pa na Nomber di Pueblo atende cu permiso pa establece na Aruba.
Esaki ta nifica cu den e Gobierno di Mike Eman, cu a ricibi di Parlamento un fondo di 1.6 Biyon di Pueblo sin posibel control directo di Parlamento ni di Reino, Benny Sevinger, segun acusacion cu ainda Huez mester confirma den posibel condena, a reparti tereno di Pueblo na hende cu ta paga.
Sucesonan na momento cu su colega di partido y di Gobierno, Paul Croes, tabata reparti permiso pa estadia a cambio di pago.
Ayera Aruba a wordo presenta cu e informacionnan cu tabata tin inval na cas di dos politico di MEP, cu ta ex Ministro Chris Romero y otro tres persona relaciona cu investigacion contra Romero.
E investigacion contra e grupo aki ta basa riba investigacion di contracto di servicio firma dor di Chris Romero como Ministro di Gabinete Wever-Croes 1.
Kico ta bay pasa despues di e entrada hudicial na cuatro adres ayera, ta tene Pueblo den suspenso mientras tin mas caso di mas politico cu mester bay rementa.
Curioso den e casonan aki ta, cu Aruba cu mester di asistencia financiero di Reino pasobra politiconanan a faya cu maneho financiero di Pueblo, ta resulta segun acusacionnan y den cierto caso pues, condena di Huez, di ta maestro y experto den organisacion criminal.
Tanto den e caso di Paul Croes como den e Caso di Benny Sevinger, a bini dilanti e maestria di e politiconan pa maneha placa na nan propio interes aparentemente.
Fundacionnan oficial a mira luz pa ricibi placa manera tanto den e caso di Benny Sevinger como den caso di Paul Croes a bini dilanti den Corte.
Den caso di Paul Croes, cu awor ta oficialmente condena y mester bay prison, “Stichting Leadership and Excellence” lo tabata e negoshi den e scandal politico, caminda entrada di e pais a bira negoshi di un politico.
Ta e politiconan aki mester dirigi Aruba y mester atende cu placa di e pais, cu awe mester paga un debe nacional cu ta inclui gastonan enorme pa Husticia.
Den caso di Paul Croes, mester a scucha 30 testigo y 21 sospechoso. Polis mester a haci su trabou cu a conduci na detencion di ocho sospechoso y finalmente tres persona a wordo encarcela.
Cuanto placa Pueblo a paga pa e investigacion di Polis? Cuanto ora, cuanto Polis, cu cuanto ekipo y material a traha, den e investigacion cu mester a wordo atende dor di Corte di Husticia cu tambe mester a prepara su mes?
Cuanto placa estadia den prison ta costa Aruba y tambe e Arubiano cu NO a haya tereno, ni permiso, ni servicio, ni nada cu a pasa bou mesa?
Kico a pasa cu e control di Parlamento? Kico cu e responsabilidad di tur Gobierno pa funciona na nomber y den bienestar di Pueblo?
Caso Flamingo mester wordo conclui. Caso Diamante a papia di placa cu Pueblo ta paga Miembronan di Parlamento pa nan traha pa Pueblo.
Siglo 21 a habri cu e caso notorio di Fondo Desaroyo Nobo San Nicolas, cu a desaparece finalmente den fondo di lama na beach.
Democracia ta grita “auxilio” mientras eleccion liber y Gobierno di Pueblo, ta agonisa, luchando den lama bruto di politica!
