ORANJESTAD (AAN): Un momento agradable y di reparti ‘mondjes’ riba Diabierna 8 di October entre un grupo di empleado na un banco local pabao di brug,
tabatin consecuencia severo pa e personanan aki ora cu diripiente den fin di siman nan a cuminza bira malo.
Ocho empleado cu a manda busca platters di Sushi pa nan come durante di nan break, a goza un mundo y a hasta gaba con dushi e cuminda tabata.
Sinembargo tanto riba Diasabra como Diadomingo ora cu nan ta na cas, nan a cuminza sinti nan mes malo y a pasa momentonan di hopi dolor y situacion di angustia. Ora cu e ocho personanan aki a contact otro, a bin haya sa cu nan tur tin mesun dolor acudo cu ta dal nan fuerte.
Esey ta e momento cu nan a realiza, cu nan lo a venena cu e Sushi platter cu nan a come. Y esaki ta algo cu nan tabatin mester di a busca yudanza medico pa e situacion.
Debi na esaki, nan tur 8 no por a presenta na trabao riba Dialuna, y esaki a afecta e servicio di e banco tambe como cu clientenan a haya nan ta warda hopi mas pa wordo atendi.
A ser mustra cu ta 8 empleado so a come e Sushi Platter aki, y el a sali nan malisimo. Nan a keda sin bin traha tanto Dialuna como tambe Diamars.
Un malesa comun asocia cu comemento di sushi ta ser yama ‘Malesa di Anisakiasis’. Esaki ta causa ora di come pisca infecta cu un bichi parasitico, cu den e curpa humano ta pega na e esofago, stoma, of intestino, y esaki por causa venenamento.
Coleganan di e empleadonan aki ta percura pa e salud di esnan cu a bira malo, y ta manda mensahe cu nan tur ta spera cu pronto nan lo recupera y ta bek na trabao.
