Algun ta pensa cu por ta atake cibernetico
- Poco-poco ta recuperando nan sistemanan bek
ORANJESTAD (AAN): Ya desde Diahuebs caba varios persona cu ta bay pa top-up pa nan coriente pre-paid a bin haya sa cu e sistema no ta funcionando. Hopi a bay den panico, pensando cu nan lo no por top-up na tempo, y cu nan cas of apartamento lo keda sin coriente.
NV Elmar a indica cu riba Diahuebs 11 di September, nan a encontra un problema tecnico riba algun di nan aplicacionnan cu ta brinda servicio na nos clientenan. Actualmente, e trabaonan ta andando pa cuminsa reestablece e aplicacionnan.
Update di 10:00 am: Riba Diabierna mainta 10:00 am, ainda e siguiente servicionan no tabata disponibel ainda, esta no por ni bay paga na ningun sucursal di Elmar, no por subi website di Elmar, no por bay na e-Connect, tampoco e CE Portal.
Tampoco no por a top-up SmartUp Prepaid na stacionnan di gasolin. Tampoco e SmartUp Prepaid y EV ChargeUp riba Pay.aw. Tampoco no por a haci pago na Elmar via Hulpbestuurskantoor ni MFA. Tampoco pago pa Elmar via WEB Aruba NV.
E compania a bisa cu e sucursal ta habri pa ricibi cliente y atende cu inkietud di cliente. Alabes, nan ta brinda e siguiente servicio na cliente: (*) Yuda cu pago online. (*) Areglo di pago. (*) Reconecta e meter di coriente den caso cu esaki ta desconecta.
Si riba Diabierna 12 di September bo lo a paga bo factura di coriente y/of TopUp e SmartUp Prepaid Meter pa no wordo desconecta, Elmar ta garantiza publico pa keda trankil cu nan lo continua suministra coriente p’abo te despues cu resolve e problema tecnico riba nos aplicacionnan.
Update di 12:00 pm: Dos ora despues, a bin splica cu Elmar a cuminsa reestablece e aplicacionnan cu ta brinda servicio na cliente. Esey kiermeen cu ya caba clientenan di SmartUp Prepaid por top-up / recarga bek, solamente via Stacion di Gasolin. Den caso cu bo no wordo reconecta bek na momento cu top-up, por fabor tuma contact cu Elmar pa atende cu esaki.
Tambe nan CE portal pa instaladonan reconoci ta bek online via browser.
Tambe nan sucursal ta habri pa ricibi cliente y atende cu inkietud di cliente. Alabes, nos ta brinda e siguiente servicio na cliente: (*) Yuda cu pago online. (*) Areglo di pago. (*) Reconecta e meter di coriente den caso cu esaki ta desconecta.
Keto bay offline: E siguiente servicionan no ta disponibel ainda, esta (*) Pago den sucursalnan. (*) E website di Elmar. (*) e-Connect. (*) SmartUp Prepaid y EV ChargeUp riba Pay.aw. (*) Pago pa Elmar via Hulpbestuurskantoor of MFA. (*) Tampoco pago pa Elmar via WEB Aruba NV.
Si rib Diabierna bo a paga bo factura di coriente y/of TopUp e SmartUp Prepaid Meter pa no wordo desconecta, bo por keda trankil cu Elmar lo continua suministra coriente p’abo te despues cu resolve e problema tecnico riba e aplicacionnan.
E proceso di reestablecemento di aplicacionnan lo continua, y lo sigui duna updates asina cu tin mas informacion.
Opinion di observadornan: Hopi hende riba Diabierna tabata convenci, cu e informacion cu numeroso proceso na Elmar a “cay afo” simultaneamente, ta parce di ta un atake cibernetico.
Aunke ningun hende na Elmar no kier bisa nada di esey, tin hopi pensamento cu nan sistema a bira victima di ‘Ransomware’, y lo a perde tur cos. Pero cu aparentemente Elmar lo no mester bay paga e miyones di Euro cu ta wordo exigi door di hackernan pa haya tur cos bek. Esey ta debi cu Elmar tin un sistema cu ta haci backup automatico.
Nan ta pensando cu NV Elmar a pasa ya henter Diahuebs y tambe Diabierna ta bezig ta re-instala tur cos bek riba nan servernan, y esey ta tumando hopi tempo. Na forma corecto ta haci esey segun un schedule di prioridad pa haci instalacion.
Cybersecurity Center sa of no: Hopi a puntra tambe, si acaso e asina yama ‘Cybersecurity Center of Excellence’ (CCOE) ta na altura di esaki of no. Pa colmo tin hopi hende na Aruba cu a tende di e CCOE aki, pero na no sa mes con pa drenta den contacto cu nan, ni ki telefon, of email nan tin.
Aruba mester di un sorto di “meldpunt” central pa bati alarma si acaso un compania of instancia importante, incluyendo compania di utilidad bira victima di atake cibernetico.
Fuera di esey, ya caba ultimo temponan por a nota cu instancianan na Hulanda, incluyendo gobierno na Den Haag tin wowo hancho habri riba e peligro di atakenan cibernetico cu por ta aumentando. Nan ta hasta sugeri y pidi ciudadanonan pa keda cu suficiente placa cash den nan man, si acaso un atake digital grandi socede na Hulanda.
E siman aki pa colmo a bin haya sa, cu avionnan militar Hulandes a tumba algun Drone Ruso cu tabata bulando riba teritorio di Polonia. Pues esey mes ta suficiente motibo pa Hackernan Ruso cuminza focus nan atencion riba Hulanda, y tur skina cu ta pertenece na Reino, incluyendo e islanan den Caribe.
Pero segun NV Elmar, loke ta pasando ta djis un “problema tecnico”, y cu ELMAR ta trahando intensamente pa reestablece e aplicacionnan mas pronto posibel, y ta pidi pueblo danki pa e comprension.
