ORANJESTAD (AAN) – Minister Danki Oduber, titular di Salud Publico y Turismo, papiando di e tema di recuperacion di Aruba su turismo den Luna di Februari,
a indica cu den comparacion cu otro competidornan, Aruba ta number uno den recupera mas lihe cu tur otro pais den nos region.
Esaki ta debi na e resiliencia di Aruba y con a sali afo despues di cada ola di Covid-19. E mandatario a sigui bisa cu e recuperacion di e mercado principal pa Aruba, cu ta esun Mericano, tambe a duna señalnan hopi positivo den Luna di Februari. Aruba a recupera 92% caba di su turismo di su mercado mas importante. For di Merca so a ricibi 108.670 turista den Luna di Februari, y esaki ta un indicacion cu e mercado Mericano ta casi yegando bek na e nivel pre-pandemia, esun di 2019. E dignatario a reitera cu esaki ta hopi importante pasobra ta e mercado di cual 90% di e industria turistico di Aruba ta depende di dje.
E dignatario a pone atencion tambe na otro mercadonan cu ta aumentando nan bishita na Aruba, manera esun Hulandes, cu a recupera 117%. El a surpasa caba e nivelnan di 2019, y esaki ta debi cu Aruba ta hayando vuelonan adicional di KLM y TUI, y por mira esaki den e resultadonan.
E otro mercado, cu ta uno cu a creciente y cu por mira hopi potencial den dje ta esun di Colombia, unda cu gobierno a anuncia caba varios vuelo nobo cu aerolineanan nobo. Tambe a mira un recuperacion di 95% den Luna di Februari, en comparacion cu Februari 2019.
Minister Dangui Oduber a subraya cu gobierno ta mirando señalnan positivo di tur e mercadonan, y e mandatario ta convenci cu na e aña 2022 aki, lo por yega atrobe na e nivelnan di 2019. E dignatario ta mira e mesun tendencia di recuperacion aki, pa e siguiente lunanan.
