Tradicionnan comercial familiar ta e exito economico di Aruba
*Taxista ta un baluarte historico di logro di turismo na Aruba
*Traspaso pa generacionnan nobo mester mantene caracter nacional
ORANJESTAD (AAN)— Den e produccion di DIARIO un punto ta keda central. Aruba mester keda Aruba pa asina generacionnan nobo por goza y sigui traha cu hermentnan nobo cu tempo ta entrega na nan, na e bienestar di Aruba cu awe y den futuro ta keda Aruba.
Cu e guia apropia cu e Gobierno dirigi pa Evelyn Wever-Croes a duna e Arubiano, Aruba a bira modelo pa Reino pa e forma cu Aruba a enfrenta situacionnan, cu te awe tin paisnan grandi na careda.
Arubianismo ta y ta keda e formula di exito di Aruba, cu no a cambia su caracter nacional pa adapta su mes na loke temponan moderno kier impone y a bira desaster pa tanto pais na mundo.
E exito di Aruba den temponan sumamente dificil manera sigur e ultimo decada tabata cu caida economico, co pandemia y tur loke por a azota mundo, tabata y ta keda cu Aruba a mantene su caracter nacional y no a entrega su identidad pa acepta formula cu no ta respeta e caracter Arubano.
Awe un punto sumamente importante ta topico na Aruba y mester ta topico principal di DIARIO, cu ta di acuerdo cu mester ensancha economia, pero esaki ta nifica cu ta amplia loke tin y no ta mishi cu loke ta sagrado pa e pais.
Pa comprende con sagrado e mentalidad Arubano ta, mester bolbe na e momento cu Lago a dicidi di cera su portanan y asina a mundo a pensa cu economia di Aruba a conoce su fin.
DIARIO tabata parti di e Aruba cu a yora ora pa ultimo bez e alarma di Lago cu a anuncia fin di dia y asina fin di un temporada economico, a resona. Pero Aruba a keda Aruba y ta como Pueblo Aruba a sigui cana.
Den e tempo aki, a edifica un Aruba nobo no a base di pensamentonan materialista na prome lugar, pero a base di e espirito di lucha nacional di e pais, cu nada por a destrui.
Aruba a acepta su Status Aparte sin hala atras y Aruba a sigui cana den e direccion cu e Arubiano a planea cu trabou sumamente duro.
Aruba a dicidi pa haci uzo di talentonan cu a sostene Lago y e entrada di turismo, cu a wordo segura pa e ultimo Bestuurscollegenan di Teritorio Insular di Aruba, cu prome cu Lago a bay, a tene e Aña di Turismo durante cual Aruba a expone na mundo loke ta haci Aruba grandi, cu ta e caracter nacional Arubano cu ta brinda mundo e mihor servicio, e mihor trato, e mihor formula pa hende por braza otro y hunto sigui cana pa porvenir.
Den esaki e taxistanan tabata forma un grupo importante pasobra e taxista ta e prome Arubiano cu cual directamente e turista tin contacto, ora e yega Aruba.
E forma cu taxistanan Arubano ta atende cu Aruba, ta uno di e puntonan clave den e exito nacional di Aruba cu na 1986 por a drenta su Status Aparte pasobra mescos cu Aruba a traha na refineria, Aruba a traha den edificacion di e sector turistico.
Ora ta atende cu e taxisti, ta atende cu e prome cara cu Aruba ta presenta na e bishitante, manera di un generacion pa otro a tuma lugar.
E tradicionnan Arubano tras di cual e exito di Aruba ta sconde, na 1986 y despues di pandemia ta sconde, no por wordo elimina sin mas.
Na Aruba, e forma con economia a wordo entrega di un generacion pa otro como parti di e totalidad di balor Arubano, mester wordo respeta.
Si comercio di Aruba por tabata parti di e base di exito nacional di Aruba pa recuperacion despues di e salida di Lago y e pandemia di Covid-19, ta pasobra Arubianonan ta entrega nan generacionnan cu ta sigui, amor pa nan pais y tradicionnan familiar ta carga e pais.
Den comercio, yiu a sigui tata. Den ofishi y den tur sector, por mira con e candela di contribucion di e pais, a pasa di un generacion pa otro.
Cada profesion tin su exigencianan. Taxistanan cu a bira e cara di Aruba cu e forma cu nan a atende cu turistanan, awe no por wordo castiga pasobra nan no por pasa nan negoshi pa nan yiunan.
Cuanto taxistanan, mescos cu otro comerciantenan, a entrega di nan mes y di nan propio ingreso, pa entrega na e turista e mihor servicio, e mihor vehiculo pa transporte e cara y imagen di Aruba, cu ta ehempel di exito pa su caracter special?
Awe no por kita for di e taxista e derecho pa entrega su yiu e permiso cu a haci cu el a haci inversionnan den auto, mescos cu tanto sacrificio grandi pa yuda economia di Aruba.
No sin mas por deshaci di un tradicion familiar cu ta base di e sector di taxistanan y ta parti di e pakete di Arubianismo cu ta exito di e sector di turismo di Aruba!
