Premier Wever-Croes:
*Resultado di eleccion na Venezuela no ta transparente
ORANJESTAD (AAN): Diaranson mainta, 31 di juli, durante Conferencia di Prensa di Gobierno di Aruba, Prome Minister Evelyn Wever-Croes a contesta diferente pregunta di miembronan di prensa riba e topico di Venezuela. Un pregunta, cu por cierto tawata straño y nada logico y sigur no por wordo tuma mucho na serio, ta e pregunta di cierto miembro di prensa comparando transparencia di resultadonan di eleccion di Aruba na aña 2021 y e falta di transparencia di e resultadonan di eleccion na Venezuela diadomingo ultimo.
Prome Minister durante e conferencia di prensa a reitera cu Gobierno di Aruba ta uni su mes na Comunidad Internacional cu ta haci un apelacion pa transparencia completo den e proceso di eleccion y den e maneho di e resultado na Venezuela.
E miembro di prensa en cuestion, a remarca cu despues cu resultado di eleccion a drenta na 2021, tawata tin yamadanan di partidonan den oposicion pa tin mas transparencia den e resultadonan y un reconteo di voto pa motibo cu nan no a keda contento cu e pueblo no a vota na nan fabor. Sinembargo, e miembro di prensa en cuestion ta bisa cu e tempo ey no a honra e peticion aki di partidonan di oposicion y ta haci e pregunta na Prome Minister si no ta algo di doble moral cu awor aki si, Gobierno ta exigi na Venezuela pa tin transparencia pero aki na Aruba mes tawatin cierto duda riba e resultado.
Prome Minister: “Bo ta comparando eleccion di Aruba di 2021 cu eleccion di Venezuela di 2024, Marco? Mi ta kere bo mester ta mas serio cu esey si”.
Prome Minister a contesta enfaticamente cu eleccion di Aruba na 2021 no tawatin duda riba e resultado mientras cu e resultado di eleccion na Venezuela no ta transparente. Na Aruba tawatin algun urna cu algun candidato a indica cu nan no ta wak famianan cu a vota pa nan den e resultado. Prome Minister a remarca cu esakinan ta cosnan cu e ta tende desde e tempo cu e ta mucha na unda cu politiconan ta bisa cu nan famia a vota pa nan na cierto urna pero ta haya cero voto na e urna ey.
“Esaki no ta un motibo pa bo bisa cu Aruba su resultado di eleccion ta di tal indole cu mester duda manera den e caso di Venezuela. No por compara resultado di eleccion di Aruba cu Venezuela. Mi no ta kere cu bo por ta serio ni niun hende na Aruba cu por pensa pa compara eleccion na Venezuela cu Aruba, por ta serio den e ponencia ey”, Prome Minister a enfatisa.
Prome Minister a recorda e miembro di prensa cu despues di eleccion 2021 na Aruba, esnan cu tawatin duda a bay corte. Y corte a bisa cu e resultado tawata estableci. E procedura di e conteo y publicacion di voto y despues e destruccion di e boletonan tur a bay segun ley y segun hues a bisa a bay corecto. “Pues, den tur humildad bo no por compara nos eleccion di 2021 cu eleccion di Venezuela di 2024”, Prome Minister a bisa.
