Hose Figaroa, presidente di FTA:
ORANJESTAD (AAN) Prome cu asumi cu un trahado no kier traha warda, mester wak bon den ki sentido esaki ta. E Presidente di FTA, Hose Figaroa a menciona den entrevista cu DIARIO, cu por ta cu e persona berdad no kier haci e trabao, pero di otro banda mester wak kico ta e compensacion cu e ta haya pa e trabao ey.
Un hende por ta dispuesto pa haci e trabao ey, pero pa e salario cu nan ta ofrece e no ta bay time. Of un hende ta wordo ofreci cu e por traha warda, pero part time, y e persona ta bisa no, e kier tempo completo pasobra e ta part time den tempo pero part time den salario tambe, cu e persona no por biba di dje.
E ta prefera busca un otro trabao unda si e ta haya ora di trabao, salario completo. “Pues no por bisa sin mas cu e trahado no kier traha traha warda pasobra e ta floho. NO, mester wak tambe kico ta e salario cu ta wordo ofreci na un trahado cu ta wordo exigi di dje pa traha warda y si nan ta dune un full time job.
Kiermen, no ta husto cu bo ta ofrece por ehemplo part time na hende local, mientras cu mañan, si bo kier busca un stranhero, bo no ta haye pa part time. Tur permiso cu bo ta haya ta pa trahado full time. Pues, ofrece e trahado local mescos cu bo ta dispuesto di ofrece un trahado importa”, Hose Figaroa, Presidente di FTA ta remarca.
