Parlamentario Shailiny Tromp-Lee:
ORANJESTAD (AAN): For di finales di 2021 nos ta bin ta scucha di sector comercial di e presion cu tin riba nos mercado laboral. Tin un necesidad grandi na trahador cu nos mercado laboral local no por yena. Esaki ta trece cune cu constantemente Gobierno tin cu keda ahusta maneho pa por atende cu tur e retonan aki.
Banda di ta duna atencion na om- en bijscholing di nos localnan mediante EPE y enseñansa (OAA y traha riba un mihor aansluiting di enseñansa na nos mercado laboral) tambe ta keda duna atencion na e proceso di admision.
E situacion aki a keda aumenta door di crecemento y actividadnan economico. Pa 2024 ta spera un crecemento economico di 8.5% y pa aña 2025 ta pronostica un crecemento di 1.3% cual cu otro palabra nos por spera cu e necesidad grandi na trahador riba nos mercado ta bay keda. Esaki ta keda subraya pa e atencion constante cu comercio ta pidi pa e reto aki.
Desde fin di 2020 Gobierno a bin ta ahustando maneho di admision cu e meta pa proteha nos economia y nos mercado laboral cu a cambia hopi door di e pandemia. Na fin di 2021 a introduci ahustacion atrobe pa haci e proceso di peticion y otorgamento di permiso di trabou na DPL y DIMAS mas eficiente y efectivo y a bin cu “Alternative legal pathways” y ampliacion riba e norma di cumplimento cu impuesto.
Desde 2022 un biaha mas (oficialmente) Comercio a trek na e bel pidiendo Gobierno pa atencion pa nan necesidad grandi na trahador. A base di consulta cu sector comercial e tempo ey a bin cu ahustacion den maneho pa por duna atencion na e necesidad grandi na trahador indica pa comercio. Pa remedia temporalmente e necesidad grandi pa trahador y e scarcedad di trahador riba nos mercado laboral local Gobierno a inclui un categoria nobo die permiso di corta duracion na 2023, e asina yama “Special Projects Permits”.
Na inicio di 2024 comercio a informa Gobierno cu nan ta spera mas accion di parti di Gobierno pasobra nan necesidad ta keda grandi y e ahustacionnan di maneho tuma no a brinda e alivio structural necesario. Nan deseo ta pa bin cu maneho cu ta brinda solucionnan structural pa nan necesidad.
Pa motibo aki mes Gobierno a bin ta reuni cu sector comercial, sindicatonan, DIMAS y DPL pa bin cu ahustacion den maneho pa brinda alivio y no tranca nos economia. Segun informacion ricibi for di Minister Glenbert Croes a base di e dialogo aki mes Gobierno a bin cu instruccion di maneho nobo pa loke ta trata “Special Project Permits” y “Alternative legal pathways”.
Den e luna aki Minister lo ta den Parlamento y lo por duna splicacion encuanto e necesidad pa a bin cu e instruccionnan nobo aki cual manera e mes ta indica cada 6 luna ta keda evalua.
Mi ta haya na su lugar pa constantemente Gobierno ta evaluando e maneho di admision, garantisando na tur momento proteccion di nos mercado laboral local pero sin perde di bista e desaroyo y crecemento acelera di nos economia y necesidad di comercio. Mester preveni cu doñonan di trabou ta sigui uza personanan indocumenta y of bin cu maneho dirigi pa atende cu e grupo grandi di indocumenta cu ta bibando riba nos isla.
