Mensahe di Parlamentario Jennifer Arends-Reyes pa hende muhe pa Dia di Hende Muhe:
ORANJESTAD (AAN): Pa Aruba ta hopi importante pa nos enfoca riba nos hendenan muhe. Den transcurso di añanan, demograficamente, tin mas hende muhe cu hende homber na Aruba. Den e forsa laboral, basicamente un 52% ta hende muhe. Segun Parlamentario Jennifer Arends-Reyes, esaki ta un muestra cu na Aruba nos tin un participacion hopi grandi di hende muhe trahado y cu e hende muhe kier bay dilanti y contribui na nos pais.
Den un entrevista cu DIARIO en conexion cu Dia Internacional di Hende Muhe, e Parlamentario a menciona cu antes e rol di hende muhe tabata mas tanto den cuido di yiunan y di e cas. E rol aki, simenbargo a cambia cu tempo. Mientras cu por ta e ta trece mas stress y responsabilidad, nos mester considera e hecho cu e hende muhe awendia mester traha tambe, cu riba su mes ta algo positivo. Sinembargo, segun el a menciona, e hende muhe mester haya mas sosten di tanto Gobierno y sector priva, pa asina den e parti laboral nan por bay dilanti y tin un bos na mesa. Den tur nivel cu tin, e bos di hende muhe mester resona.
E hende muhe mester por haya tur e facilidadnan pa entre otro busca yiunan for di scol, pa participa na anochinan di rapport of ouderavond y pa e cuido di nan yiunan despues di scol. Esakinan ta algun cos cu e parlamentario a menciona cu por yuda den e proceso especialmente di mamanan soltero.
Segun Parlamentario Arends-Reyes, Gobierno tambe por bin cu mas iniciativa pa yuda den casonan asina pero sigur tambe den e casonan di hendenan muhe cu ta enfrenta problemanan di salud mental y di violencia relacional entre mas problemanan.
E parlamentario a menciona cu esaki ta problemanan social cu ta existi den nos sociedad y Parlamento, Gobierno y instancianan so no por yuda alivia. E ta algo cu henter nos comunidad tin cu carga y tambe un responsabilidad pa nos hendenan homber.
Na final Parlamentario Arends-Reyes a duna su mensahe na tur hende muhe na Aruba bisando, “No limita bo mes, bay pa bo soñonan, kere den bo mes y sigui padilanti”.
