ORANJESTAD (AAN): Nigel Maduro ta conoci na Aruba, como e persona cu a cuminsa tuma accion aña pasa cu e graffiti na e driekiel rotonde di Eagle Beach,
y e aña aki cu varios protesta y “beach parties” pa educa pueblo y turistanan tocante overtourism y sostenibilidad. Maduro ta opina cu deseo di pueblo no ta pa sigui bende e isla, pero pa preserva libertad, pueblo su salud, e integridad di comunidad y e bunitesa di naturalesa. Pero no por logra esey cu un gobierno instabil cu no ta interesa den scucha su mesun hendenan.
“Ora mi a bin back Aruba aña pasa, despues di a finalisa mi Master’s Degree den Sustainable Development, mi a keda sorprendi y desapunta cu e cambio di nos isla. Sustainable development, of desaroyo sostenibel, ta un manera di desaroya un pais cu ta garantisa cu e generacionnan di futuro por sigui disfruta di e recursonan di su pais. Pero esaki no ta e realidad na Aruba,” Maduro a indica.
Aruba ta crece menos cu 1% di e cuminda cu pueblo ta come y e mayoria di nos hendenan ta kere cu e ta imposibel pa crece cuminda di bon calidad riba nos tera. E ecosistema marino di Aruba a cay den otro, e mondinan cu mi tabata cana tempo mi tabata mucha a worde rosa, tin hopi bashamento di asfalt. Hopi di nos bestia y matanan ta na peliger di extincion local, manera e calco, streya di lama, varios sorto di coral, varios pisca, prikichi, patrishi y hopi otro parha. E lamanan ta sushi y contamina, nan ta yen di alga y santo shinishi y stinki. E playanan ta birando mas chikito door di tur e servicionan di beach tents y palapa.
Den tur esey, casnan a bira mucho caro pa nos mesun hendenan cumpra, tereno ta worde cumpra door di inversionista pa traha Airbnb y condo, nos salud na nivel nacional ta malo, nos desunion ta crece, nos tin stres financiero, stres na trabao, stres na cas. Den weekend nos kier bay beach cu nos famia pa goza di nos tempo liber, pero no tin beach pa local mas. Tur ta yen di hotelnan grandi y turistanan cu no ta respeta nos naturalesa y nos espacio pa paz.
Despues di e accion di graffiti, Maduro a lanta e movimento Land Back cu otro ciudadanonan concerni, y a organiza un protesta pacifico pa 18 di Maart, tambe 27 di april, Dia di Rey. Despues a dicidi pa organiza “beach parties” en bes di protestanan. E idea tabata cu esaki lo ta un oportunidad pa nos localnan y turistanan bin hunto riba beach pa goza di nos isla y nos comunidad, y alavez organiza workshops educativo tocante sostenebilidad y e maneho di desperdicio.
Loke e ta yama “beach party” ta un forma pacifico di “protesta”. Aki basa riba 1 publicacion riba Facebook di 1 turista, sin puntra loke a pasa, gobierno a yama nan pa “violento y agresivo”. Y nos gobierno no ta ignorante. Nos gobierno sa loke e pueblo kier, paso nan a puntra nos. ATA (Aruba Tourism Authority) a haci un encuesta varios luna pasa tocante nos opinion di e industria di hotels y turismo na Aruba, y nunca a publica e resultadonan, cual mester a sali den April – Juni, y awo ta September. Mustra nos cu transparencia ta kico nos hende a contesta riba e encuesta.
Segun Maduro, awor ta momento pa hendenan lanta para y cambia e rumbo di e isla. E movemento Land Back t’ey pa aumenta e bos di e pueblo y segura cu e gobierno ta scucha. E lo haci un anuncio importante otro siman 26 di September na Ayo Rock Formation.
