Bon funcionamento di comunidad ta base di sistema democratico
*Seperacion di poder ta proteha un comunidad contra wega individual
*Pueblo no por tin miedo di yama Polis pa no haya periodista den su cas
ORANJESTAD (AAN) — Na momento cu Montesquieu a presenta e separacion di poder entre Gobierno, Parlamento y Husticia, el a entrega mundo un forma pa democracia por a bira realidad.
Den e separacion di poder, Montequieu a garantisa un bon funcionamento di comunidad cu ta e base pa democracia cu mester duna ciudadanonan bienestar individual sin ningun tipo di discriminacion.
Ora papia di democracia, cu ta basa riba decision di pueblo, ta papia tambe di un pueblo bon informa y den e proceso aki periodismo ta hunga un papel importante mientras periodismo por tene su mes na regla.
Un comunidad democratico no solamente ta un comunidad cu cantidad di derecho, pero tambe un comunidad cu deber di cual e prome ta cu ta respeta ley pa asina a base di e sistema legal e comunidad por funciona na un forma ordena.
Tin un motibo cu Montesquieu no a tene su mes solamente na Gobierno y Parlamento cu mester controla Gobierno, pero el a bay mas leu y a introduci Husticia cu ni Gobierno ni Parlamento por tin den nan man.
Si prensa ta yama su mes di Cuater Poder, prensa mester sigui mes regla cu Gobierno y Parlamento mester sigui ora ta atende cu respet pa Ley, cu Polis como un ala ehecutivo di Husticia, ta representa den bida diario.
Un gobernante, un miembro di Parlamento, un periodista, un ciudadano cu ta e votado y un representante di Husticia, tur mester aporta na e bon funcionamento di un pais cu ta exigi respet pa nos leynan y asina respet pa otro y pa nan parti di poder.
Esaki ta e circulo di funcionamento di un comunidad cu ta exigi tur hende tene nan mes na ley.
Un Polis mester percura pa respet pa ley cu ta conduci na husticia, caminda e persona cu ta honra ley ta wordo premia dor di e bienestar di su comunidad mientras un persona cu ta kibra ley pa paga pa su delito.
Polis no por mishi cu libertad di expresion cu ta hancra den nos leynan. Esaki ta nifica cu un Polis no por stroba un periodista haci su trabou den cuadro di loke ta considera su trabou.
Un periodista tampoco por stroba Polis di haci su trabou di no permiti hende viola ley cu a conta pa tur hende sin discriminacion of excusa .
Ora un ley di emergencia wordo dicta, e ta conta pa tur hende y Polis mester cumpli cu su tarea di proteha hende contra su mes. Na mes momento mester evita cu atencion di Polis sin necesidad ta wordo kita pasobra un persona den un situacion nacional di emergencia, sin motibo vital, ta riba caya scur y bandona y por bira victima di situacion peligroso.
Trabou di Polis ta basa riba estudio, educacion avansa, cu ta haci Polis experto riba su tereno mescos cu otronan ta yama nan mes experto.
E comunidad mester funciona y e miembro di comunidad mester por wordo sirbi dor di Polis.
Na e momento aki na Aruba, cantidad di hende tin miedo di yama Polis pa casonan cu Polis por yuda evita di escala. Hende tin miedo cu prome cu Polis por yega, ya comunidad a wordo informa cu tin un problema personal cu no tin nada di haci cu libertad di prensa.
Pa tin democracia, un pais mester funciona na bienestar di uno y tur pa evita cu libertad ta bira free for all! Puntra Hulanda!
