ORANJESTAD (AAN): E organizadornan di e evento di Flip Flop Festival di Diasabra awor, a tuma decision pa boluntariamente muda e festival, for di beach di Bushiri, y awor lo ta na Harbour Arena.
Loke a pasa ta cu ora cu ta preparando e escenario na Bushiri, a ripara cu tin un neishi di shoco riba e tereno. Inmediatamente a tuma contacto cu esnan cu ta encarga cu e proteccion di shoco pa asina por tuma medida pa proteha e bestianan. Aruba Conservation Foundation (ex-Fundacion di Parke Nacional) a dicidi di cera e area cu cabuya y tambe despues a pone un borchi. E organizadornan a haya e conseho pa adicionalmente pone heki halto y tapa esaki rond di e area durante di e evento mes. Un otro alternativa cu a keda presenta ta pa evalua si lo por muda e neishi. Sinembargo pa cu esaki no lo tabata tin suficiente tempo mirando cu esaki tin un proceso complica cu ne.
Despues di varios reunion, e organizadornan mes a dicidi voluntariamente pa muda e evento for di Bushiri Beach Arena. Pues mester start un proceso complica di desarma tur cos y hiba nan pa e lugar nobo.
