Director di KvK Martijn Balkestein:
*Minister Wever ta bezig pa bin cu solucion
ORANJESTAD (AAN) – Director di Camara di Comercio y Industria, Martijn Balkestein, den entrevista cu DIARIO a bisa cu ta importante pa departamentonan concerni traha hunto, pa evita cu e asina yama “shadow economy” sigui crece.
El a pone un ehemplo, relatando cu Profesor Dr. Schneider a haci, riba peticion di Minister Geoffrey Wever, titular di Asunto Economico, un estudio pa wak kico ta e consecuencianan den nos economia, causa pa esnan cu no ta paga impuesto, ni primanan social, etc. Dr. Schneider a indica e tempo ey caba cu e ta afecta 20% di e negoshinan na Aruba no ta cumpli cu esey, y ta bon posibel cu despues di e boom di negoshi “Airbnb” e porcentahe a subi.
KvK ta trahando cu Departamento di Impuesto y tur luna ta manda un officer gratuitamente pa DIMP, cu ta indica tur e companianan nobo. Loke ta haci ta cu por check, fuera di KvK su status, cu WEB y ELMAR, pasobra na momento cu bo converti bo cas den un Airbnb, di mes e consumo di awa y electricidad ta aumenta masha hopi, y e ora ey por haci un investigacion. “Nos como Camara di Comercio ta condena, sigur, cu hende ta opera no completamente legal, contra e ley, pasobra no ta competencia husto si bo no ta paga impuesto, y ta competi cu esnan cu si ta paga impuesto”, Balkestein a señala.
El a duna di conoce cu Minister Wever ta bezig cu un maneho nobo. El a presenta esaki den pasado, esey ta e prome estudio y e ta bezig awo tras di cortina pa lanza esey, y e meta ta preserva loke tin actualmente, pero pa evita e consecuencia negativo cu e ta trece cu ne, por ehemplo e Airbnb a causa cu prijs di huur di cas y construccion a bira hopi caro.
El a agrega cu e sa cu DIMP a traha hunto ATA tocante e area aki, nan a bin hasta cu ideanan di un plataforma pa registra Airbnb, y otro plataforma. Pero e tin entendi cu esaki no a bay manera tabata desea of ta dificil pa controla.
