PARAMARIBO: E muher S.K. di 19 aña di edad, kende a zwaai y tira su baby di 3 luna for di un auto, a wordo poni den libertad Diabierna cu a pasa, basa riba un peticion di su abogado.
E abogado a duna e muher teenager asistencia huridico gratis. A haci esaki basa riba Articulo 54-A pa por libera su cliente. Huez Comisario a bay di acuerdo y a pone e muher den libertad inmediatamente.
Tabata Dialuna 20 di December 2021 cu e muher a wordo aresta door di Polis na Santo Boma. For di investigacion a sali na cla cu e mama y tata di e baby riba e dia ey a pleita den auto coriendo riba Magentakanaalweg. Den su rabia, e muher a zwaai su baby for di bentana di auto benta afo.
E pareha tin relacion pa dos aña caba, pero desde cu e mama y baby a bay biba cu e tata, tin pleito constant entre nan dos. E homber e ora a dicidi pa hiba e mama y baby bek cerca nan wela pa stop cu e pleito diario.
Pero na caminda pa e wela, e fuse di e mama a bula den auto. El a cuminza dal e homber sin stop, y pesey el a dicidi na para e auto banda di caminda. Aki ta unda cu e mama a gara e baby mucha homber y zwaai esaki for di bentana.
Testigonan a mira con e tata a core baha di auto pa piki e baby, y aki e muher a bira aun mas histerico. Un enfermero cu pa casualidad tabata core nan tras y cu a mira tur cos, a para tambe y a bay duna asistencia na e baby. El a mira e urgencia y a core pidi Ambulans pa yega eynan. Hendenan cu a mira esaki a yama Polis.
E tata a bisa Polis cu tur esaki ya ta demasiado pe. Y ora cu nan a interoga e mama, el a duna autoridad dos diferente version. Prome el a bisa cu el a djis pone e baby riba asiento patras, y cu debi cu e tata a lastra un brake, esey a pone e baby cay.
Despues e mama a cambia e storia na Polis, y bisa cu e baby tabata den su scochi.
Cu Ambulans e baby a wordo transporta pa Hospital, unda el a wordo hospitaliza.
E muher a pasa tanto Pasco y tambe Aña Nobo encarcela. Su abogado dilanti Huez Comisario a trece un defensa social pa asina libera e mama despues di a keda varios siman tras di trali.
