Minister Ursell Arends a anuncia:
ORANJESTAD (AAN)—Den entrevista cu DIARIO, Minister Ursell Arends, Titular di Transporte, Medio Ambiente, Integridad y Asuntonan di Adulto Mayor, den e contexto di integridad a splica cu BIA (Bureau Integriteit Aruba) a presenta kico nan ta haciendo, y den e lunanan nos dilanti, BIA lo cuminza implementa un codigo di integridad, den henter e aparato publico, pa esaki conta pa tur ambtenaar.
“Na 2024 nos lo cuminza huramenta tur e ambtenaarnan y e empleadonan contrata, pasobra esaki tambe ta un paso importante ora cu ta trata e tema di integridad.
Esaki ta aspectonan cu nos ta trahando pa inculca e tema di integridad den e aparato publico y sigui desaroya esaki tambe. Integridad no ta algo cu bo ta para dilanti spiel y bisa ‘ami y mi integridad’. E no ta bay asina. E ta algo cu bo ta traha diario riba dje pa bo ta un lider. Pasobra ta integro ta haci bo un lider unico cu ta sigui su compas moral, y esey ta loke mester guia bo diariamente”, Minister Ursell Arends a subraya.
El a agrega cu esaki gobierno kier inculca den henter aparato publico, pero tambe den sector priva y den e ciudadanonan na Aruba. E trayectoria di huramentacion di tur empleado publico, ta wordo lidera aworaki door di DRH y si tur cos ta bon, e mandatario a subraya, na Maart 2024 ta cuminza e proceso di huramentacion.
