Inspector di IVA Cheryl Rosa Fingal:
ORANJESTAD (AAN)—Den entrevista cu señora Cheryl Rosa Fingal, Inspector di Inspectie Volksgezondheid Aruba (IVA), el a menciona cu na aña 2019-2020, IVA a bishita cada dentista y a traha un rapport na 2020, en combinacion cu tur loke otro departamentonan di gobierno, y e asociacion di dentistanan a purba di haci, y nan ta wak cu ningun ta yegando mucho leu.
“Nos ta hayando melding cu nos tin demasiado dentista, por ehemplo, of cu tin dentistanan cu ta wak pashent y ta bise cu nan ta wak 10 buraco den boca, anto nan ta bay otro dentista cu ta bisa cu no tin ni un buraco; nos ta haya un ‘vrum vrum’. Mas cu esey nos por haya di parti di e dentistanan mes, cu ta toca calidad di cuido dental”, Inspector Fingal a comenta.
El a subraya cu nunca nan a haya algo specifico cu IVA por ranca sali, anto haci algo cu cu nan teozicht cu nan tin.
Momento a yega aña pasa cu IVA a acerca Inspectie Militaire Gezongdheid Zorg, door cu Inspectie di Hulanda mes no tin un dentista, pero nan kier a sali bon prepara. “Nos a puntra un dentista den e ramo di Inspector, pa e bin reforza nos, y nos a ranca sali na cinco practica djis pa nos haya un base, con leu e procesonan ta aworaki.
“Nos tin AZV cu tin cierto contratonan cu dentista, tin un instituto di calidad cu ta traha protocol recht leynan, nos tin un Inspectie cu mester controla den e veld, nos tin asociacionnan no so di dentista pero di tecnico dental, y di higienista dental, y ora nos a bay wak nos a ripara cu no tin mucho organiza ainda, sistematicamente”, Inspector Cheryl Fingal a indica.
El a bisa cu ora IVA sali inspecciona nan mester di algo fiho y solido den nan man, manera un reglamento cu mester sigui. Pasobra si IVA bay controla pero no tin un kader di norma, cu mester atene na dje, tanto bal. El a subraya cu na Aruba no tin algo palabra den calidad dental, cu como Inspectie por bisa “esey si mag, esey no mag”. Esey ta e lucha di Inspectie, cu no tin un “norman kader”, un “toezicht kader” pa ranca sali, y e ta puntra ki recht ley IVA ta uza anto?
Den un siguiente articulo DIARIO ta sigui elabora riba e entrevista aki cu Inspector señora Cheryl Fingal.
