Resultado di investigacion STEPS 2023 riba uso di alcohol
ORANJESTAD (AAN): Durante aña 2023 Departamento di Salud Publico den colaboracion cu WHO/PAHO y Oficina Central di Estadistica (CBS) a organiza un investigacion Nacional cu a carga e nomber di STEPS 2023.
Meta di STEPS 2023 tabata pa colecta informacion valioso riba salud di nos comunidad di forma cu organizacionan encarga cu maneho di salud publico por ricibi un bista actual di e salud di nos poblacion pero tambe conoce e factornan di riesgo cu por conduci na malesanan cronico. Conociendo e factornana di riesgo aki e diferente organizacionan lo por traha riba manehonan nobo mas dirigi riba mehoracion di e salud di nos hendenan.
Riba topico di uso di alcohol, investigacion Nacional STEPS 2023 a conclui cu 21% di Aruba su populacion ta participa na bebemento di alcohol excesivo.
E hende homber ta bebe mas alcohol cu un promedio di 5,5 bebida pa ocacion compara cu e hende muhe cu ta bebe 3,3 bebida pa ocacion.
Manera ta conoci, uzo excesivo di alcohol por conduci na sobre peso, problema cu salud mental, cancer y por afecta organonan manera curazon, higra y stoma.
Cu e informacion aki conoci, e ora a yega pa nos dal e paso pa nos salud y “cambia nos habitonan”, pues abo ta cla p’e?
