CEO di ATA, Ronella Croes:
ORANJESTAD (AAN): CEO di Oficina di Turismo (ATA), Ronella Croes a splica cu pa loke ta adicion di actividadnan nobo y inversionnan pa Aruba, mester tene cuenta cu a caba di pasa den un pandemia.
Nos obstante, algun inversion a continua, pero ta mira tambe cu e aña aki ta habri cu e 'soft opening' di Embassy Suites cual no ta un actividad, pero ta un inversion clave den turismo, Croes a indica.
Pa loke ta trata e parti di actividad tin algun punto importante. El a bay bek na 2018. ATA a conduci diferente estudio y un di nan ta e estudio di capacidad di carga. Di eynan a sali hopi punto clave.
E otro estudio cu a conduci di biaha y a tene cuenta cu e estudio di capacidad di carga ki segmentonan Aruba mester bay p'e, a bisa.
E dos estudionan aki ta clave y di aki por mira cu a sali, e proyecto di 'Mountain Bike Trails' di 54 kilometer pa cual su construccion lo cuminsa pronto.
Di akinan a sali tambe e proyecto cu ATA a lansa hunto cu Qredits na 2011 cu ta e 'Aruba Signature Experience' . Na 2022 a anuncia cuater compania ganador cu a presenta proposicionnan cu ta den linea cu e segmentonan cu kier stimula, Ronella Croes a duna di conoce.
El a agrega cu e di dos edicion di e programa aki ta pendiente y e companianan ta siguiendo tur loke mester haci como parti di e programa aki.
Pero di aki a sali tambe, por ehempel, posicion di ATA pa cu UTV/ATV's. "Pues no solamente kico bo kier stimula, pero kico bo kier limita tambe y esaki ta un ehempel di un actividad cu toch kier limita. Bo kier remplaz'e, entre otro parcialmente cu por ehempel, e parti di 'mountain biking' y otro actividadnan cu nos ta stimula.
Ta trata di diferente ehempel di pasonan cu ta sigui un secuencia a base di estudio y di e vision pa asina sigui stimula hunto cu otro autoridadnan, a agrega.
Ronella Croes a laga sa cu tambe lo sigui duna aporte na por ehempel, 'Aruba Hi-Winds' cu ta uno clave y cu tin hopi oportunidad pa Aruba eynan. Pero tambe e KLM Marathon y Aruba Beach Tennis, como tambe otro actividad den mundo di golf.
El a finalisa bisando cu ATA lo haci un inventario na 2023 pa wak kico ta e oferta actual y pa actualisa tur e oferta di diferente actividad pa asina yuda influencia y fiha maneho di Aruba pa loke ta trata kico mester.
